بۇل تۋرالى ساۋدا جانە ينتەگراسيا ءمينيسترى سەرىك جۇمانعارين ايتتى.
ازىق-تۇلىك باعاسىندا – 1،4%، ازىق-تۇلىك ەمەس تاۋارلاردا – 0،9%، اقىلى قىزمەتتەردە 0،7% ينفلياسيا بولدى، دەپ حابارلايدى Almaty-akshamy.kz
ازىق-تۇلىك ينفلياسياسىنىڭ ەڭ جوعارى دەڭگەيى استانا جانە شىمكەنت قالالارىندا (2،2%)، قىزىلوردا جانە سولتۇستىك قازاقستان وبلىستارىندا – 1،8%، اقتوبە وبلىسىندا – 1،7%، ۇلىتاۋ وبلىسىندا 1،5% قۇرادى.
"الەۋمەتتىك ماڭىزى بار ازىق-تۇلىك تاۋارلارى باعاسىنىڭ يندەكسى جىل باسىنان بەرى 1،7% بولدى. جىل باسىنان بەرى ەڭ جوعارى ءوسۋ قارقىنى ماڭعىستاۋ، ۇلىتاۋ وبلىستارىندا جانە استانا قالاسىندا بايقالدى. تاۋارلار بولىنىسىندە جىل باسىنان بەرى ەڭ جوعارى ءوسىم پيازدا (22،5%)، كۇرىشتە (5،2%)، قىرىققاباتتا (4،1%)، ءسۇت جانە سابىزدە (3،1%)، كارتوپتا (3،0%)، روجكيدە (2،6%) بايقالدى"، - دەدى ۆەدومستۆو باسشىسى.
الەۋمەتتىك ماڭىزى بار ازىق-تۇلىك تاۋارلارى باعاسىن رەتتەۋ جونىندەگى شارالاردى تالداۋ بارىسىندا ماڭعىستاۋ وبلىسىندا باعانى تۇراقتاندىرۋ تەتىكتەرىن ىسكە اسىرۋعا كوزدەلگەن 3،6 ملرد تەڭگەنىڭ 2 ملرد تەڭگەسى ىسكە قوسىلماعانى انىقتالدى.
"ۇلىتاۋ وبلىسى دا - باعانىڭ ءوسۋى بويىنشا كوشباسشى. ال، استانا قالاسىندا "اينالىم سحەماسى" تەتىگى بويىنشا قارجىلاندىرۋدىڭ بولىنگەن سوماسى 14 ملرد تەڭگەنى قۇرايدى، ءبىراق ءوڭىر وتكەن جىلدىڭ قورىتىندىسى بويىنشا دا، جىل باسىنان بەرى دە باعانىڭ ءوسۋى بويىنشا كوشباسشىلار ۇشتىگىندە قالىپ وتىر"، - دەپ اتاپ ءوتتى سەرىك جۇمانعارين.