پرەمەر-مينيستر رەسپۋبليكالىق جانە جەرگىلىكتى اۆتوجولداردى ينتەرنەتپەن قامتۋدى تاپسىردى
پرەمەر-مينيستر ءاليحان سمايىلوۆ ەلىمىزدە ينتەرنەت جانە بايلانىس ساپاسىن ارتتىرۋعا قاتىستى ءبىرقاتار تاپسىرما بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«باعدات باتىربەك ۇلى، ساپالى ينتەرنەت جانە ۇيالى بايلانىسپەن قامتۋعا قاتىستى نارازىلىقتار مەن شاعىمدار تۋرالى جاقسى بىلەسىز. ساپالى بايلانىس قالالىق جەرلەردە دە بولماي جاتادى. ءقازىر ءبارىن ۇيالى تەلەفوننىڭ كومەگىمەن الۋعا بولادى. كەيدە ينتەرنەتتىڭ دۇرىس بولماۋىنان مۇمكىن بولماي جاتادى. بۇل ماسەلەنى شەشۋ كەرەك. مەملەكەت باسشىسىنىڭ تاپسىرماسى بويىنشا بارلىق ءوڭىر (قالا، اۋدان، اۋىل) ساپالى ۇيالى بايلانىس جانە ينتەرنەتپەن قامتاماسىز ەتىلۋى ءتيىس»، - دەدى ءاليحان سمايىلوۆ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ كەڭەيتىلگەن القا وتىرىسىندا.
سونداي-اق، پرەمەر-مينيستر رەسپۋبليكالىق جانە جەرگىلىكتى اۆتوجولداردى ينتەرنەتپەن قامتۋدى تاپسىردى.
«مينيسترلىك ۇيالى بايلانىس پەن ينتەرنەتتىڭ ساپاسىنا تالداۋ جۇرگىزۋى قاجەت. سونىڭ نەگىزىندە ءتيىستى ءىس-شارالار ازىرلەنىپ، ول «قولجەتىمدى ينتەرنەت» ۇلتتىق جوباسى شەڭبەرىندە قابىلدانۋى ءتيىس. بۇگىندە ەلىمىزدە 5G ۇيالى بايلانىسىن ەنگىزۋ جۇمىستارى ءجۇرىپ جاتىر. ءبىرىنشى كەزەكتە رەسپۋبليكالىق ماڭىزى بار قالالار مەن وبلىس ورتالىقتارىن قامتۋ جوسپارلانىپ وتىر. اتالعان جۇمىس 2027 جىلى اياقتالۋى كەرەك»، - دەيدى ول.
ۇكىمەت باسشىسى وڭىرلەردە 3G جانە 4G بايلانىس ستاندارتتارىن ودان ءارى دامىتۋ ماڭىزدى ەكەنىن ەسكە سالدى.
بۇعان دەيىن حابارلاعانىمىزداي، وتكەن جىلدىڭ قورىتىندىسى بويىنشا مەملەكەتتىك قىزمەتتەردى ەلەكتروندى تۇردە الۋ 92%-عا دەيىن جەتتى.