مينيستر تارازداعى بالا ساتۋ وقيعاسىنا پىكىر ءبىلدىردى

بارلىق پەرزەنتحانادا بەينەباقىلاۋ جۇيەسى ورناتىلعان.

ق ر دەنساۋلىق ساقتاۋ ءمينيسترى اجار عينيات بالا ساۋداسىمەن كۇرەس قالاي ءجۇرىپ جاتقانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«مەنىڭ ويىمشا، بىزدە مۇنداي جاعدايلار شامامەن بەس جىل بۇرىن بولعان. سودان كەيىن بۇكىل پەريناتالدىق ورتالىقتار مەن پەرزەنتحانالارعا بەينەباقىلاۋ ورناتتىق. بالادان باس تارتقان انالاردىڭ جانىندا بولاتىن مامانداردىڭ، پسيحولوگتاردىڭ جۇمىسىن ۇيىمداستىردىق. وسىنداي ناقتى جۇمىستار جۇرگىزىلدى»، - دەدى ا. عينيات.

سونىمەن قاتار مينيستر تارازداعى وقيعانىڭ ءمان-جايىن ناقتى بىلمەيتىنىن ايتتى.

«بارلىق پەرزەنتحانادا بەينەباقىلاۋ جۇيەسى ورناتىلعان. دارىگەرلەر پالاتاداعى جاعدايدى قاراپ وتىرادى. الايدا جاقىندا بولعان وقيعانى نازارعا الا وتىرىپ، ەل بويىنشا مەديسينالىق پەرسونالمەن تاعى دا ءتيىستى جۇمىستى اتقاراتىن بولامىز»، - دەدى مينيستر.

بۇدان بۇرىن حابارلانعانداي، تارازدا جاڭا تۋعان ءسابيدى 1،5 ملن تەڭگەگە ساتقان اكۋشەرلەر قاماۋعا الىندى.

بيىلعى 12 قاڭتار كۇنى اتالعان دەرەك بويىنشا ق ر قك 135-بابىنىڭ 1-بولىگىمەن سوتقا دەيىنگى تەرگەۋ باستالعان.

ونىڭ بارىسىندا 39 جاستاعى ايەلدىڭ جاڭا تۋعان قىز بالانى اكۋشەردەن 1،5 ملن تەڭگەگە ساتىپ العانى اشكەرە بولعان.