ەكۇ-عا وتباسىلىق جۇپتار دا، جەكە ادام دا قاتىسا الادى
بيىل «اڭساعان ءسابي» باعدارلاماسى بويىنشا ەكۇ اياسىندا 7 مىڭ كۆوتا ءبولىندى. بۇل تۋرالى ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اڭساعان ءسابي» باعدارلاماسى بويىنشا ەكۇ اياسىندا بولىنگەن كۆوتا سانى 7000-عا دەيىن كوبەيدى. وسى ورايدا ەلىمىزدە 20-دان استام ءتيىستى ورتالىق بار. سوندىقتان ستاندارتقا سايكەس دارىگەرلەرى بار، قۇرال-جابدىقتارى جاساقتالعان ورتالىقتار باعدارلاماعى جۇزەگە اسىرۋعا قاتىسىپ وتىر. بيىلعا دا 7 مىڭ كۆوتا ءبولىندى»، - دەدى ا. عينيات سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ايتا كەتەيىك، بۇل ەم-شارا تەراپيالىق جولمەن ەمدەۋ ناتيجە بەرمەيتىن بەدەۋلىك دياگنوزى قويىلعان پاسيەنتتەرگە ارنالعان.
ەكۇ-عا وتباسىلىق جۇپتار دا، جەكە ادام دا قاتىسا الادى. مىندەتتى تۇردە ۇمىتكەردىڭ ەرىكتى جازباشا كەلىسىمى بولۋى كەرەك.
سونداي-اق، قازاقستان ازاماتى بولۋى جانە دەنساۋلىق ساقتاۋ مينيسترلىگى بەلگىلەگەن مەديسينالىق پارامەترلەرگە (رەپرودۋكتيۆتى جاس – 18-دەن 42 جاسقا دەيىن، قالىپتى سوماتيكالىق جانە ەندوكريندىك مارتەبە، جوعارى فولليكۋليارلىق رەزەرۆ) سايكەس كەلۋى قاجەت.
بۇدان بۇرىن حابارلانعانداي، 2020 جىلى پرەزيدەنت «اڭساعان ءسابي» ارناۋلى باعدارلاماسىن ىسكە قوسۋدى تاپسىردى.
2022 جىلدىڭ اياعىندا «اڭساعان ءسابي» باعدارلاماسى اياسىندا 6،5 مىڭ ايەلگە كومەك كورسەتىلگەنى حابارلاندى.
ناتيجەسىندە 2650 وتباسىندا 3110 ءسابي دۇنيە ەسىگىن اشتى.