ۇكىمەت بالالى وتباسىلارعا 4 ءتۇرلى جاردەماقى بەرەدى

№1. بالا تۋعاندا بەرىلەتىن جاردەماقى.

بۇل – بالا تۋۋعا بايلانىستى تاعايىندالاتىن جانە تولەنەتىن ءبىرجولعى مەملەكەتتىك جاردەماقى. تۋۋ جاردەماقىسى جۇمىسشىلارعا دا، جۇمىس ىستەمەيتىن ايەلدەرگە دە تولەنەدى. بالا تۋعاندا بەرىلەتىن جاردەماقىنى تاعايىنداۋ ءۇشىن حقكو نەمەسە eGov ارقىلى ءوتىنىش بەرەدى. ءوتىنىش بەرۋشىنىڭ كەلەسى قۇجاتتارى اقپاراتتىق جۇيەلەردەن الىنادى:

• جەكە باسىن كۋالاندىراتىن قۇجات؛


• بالانىڭ تۋۋ تۋرالى كۋالىگى نەمەسە احاج ورگاندارى بەرگەن تۋۋ تۋرالى اكتىلىك جازبادان ءۇزىندى كوشىرمە نەمەسە ازاماتتىق حال اكتىلەرىن تىركەۋ تۋرالى انىقتاما مالىمەتتەرى؛


• نەكە قيۋ جانە بۇزۋ تۋرالى كۋالىك؛


• بالاعا قامقورشىلىق بەلگىلەنگەنىن راستايتىن قۇجات نەمەسە تۋۋ تۋرالى اكتىلىك جازبادان بالا اسىراپ الۋ تۋرالى مالىمەتتەر؛


• تۇرعىلىقتى جەرى بويىنشا تىركەلۋى تۋرالى مالىمەتتەر.

جاردەماقى مولشەرى:

• ءبىرىنشى، ەكىنشى جانە ءۇشىنشى بالانىڭ تۋۋىنا – 38 اەك نەمەسە 131 100 تەڭگە؛


• 
  

  ءتورتىنشى جانە ودان دا كوپ بالاعا – 63 اەك نەمەسە 217 350 تەڭگە.

  
  

№2. بالا كۇتىمى بويىنشا بەرىلەتىن جاردەماقى.

بالا كۇتىمى بويىنشا جاردەماقى بالا تۋعان كۇننەن باستاپ ول 1،5 جاسقا تولعان كۇندى قوسا العاندا تاعايىندالادى. جاردەماقىنى تاعايىنداعان كەزدە وتباسى قۇرامىندا ءتىرى تۋعان، اسىراپ الىنعان، سونداي-اق قامقورشىلىققا الىنعان بالالار ەسكەرىلەدى.

قولدانىستاعى زاڭناماعا سايكەس، جۇمىس ىستەمەيتىن اتا-اناعا ارنالعان جاردەماقىلار مولشەرى:

• ءبىرىنشى بالاعا – 5،76 اەك نەمەسە 19 872 تەڭگە؛


• ەكىنشى بالاعا – 6،81 اەك نەمەسە 23 495 تەڭگە؛


• ءۇشىنشى بالاعا – 7،85 اەك نەمەسە 27 083 تەڭگە؛


• ءتورتىنشى جانە ودان دا كوپ بالاعا – 8،90 اەك نەمەسە 30 705 تەڭگە.

قانداستارعا بالا تۋعان كۇننەن باستاپ، ءبىراق قانداس مارتەبەسى بەلگىلەنگەن كۇننەن كەيىن تاعايىندالادى.

بالانىڭ تۋۋىن تىركەگەن كەزدە بالا تۋعاندا بەرىلەتىن جانە بالا كۇتىمى بويىنشا جاردەماقىعا ءبىر عانا ءوتىنىش بەرۋگە بولادى.

№3. كوپبالالى وتباسىعا بەرىلەتىن جاردەماقى.

كامەلەتكە تولماعان ءتورت جانە ودان كوپ بالالارى، ونىڭ ىشىندە 18 جاسقا تولعاننان كەيىن ءبىلىم بەرۋ ۇيىمدارىن بىتىرەتىن ۋاقىتقا دەيىن (ءبىراق 23 جاسقا تولعانعا دەيىن) ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوو-دان كەيىنگى ءبىلىم بەرۋ ۇيىمدارىندا كۇندىزگى وقۋ نىسانى بويىنشا ءبىلىم الاتىن بالالارى بار كوپبالالى وتباسىلارعا تاعايىندالاتىن جانە تولەنەتىن اي سايىنعى مەملەكەتتىك جاردەماقى. ونىڭ مولشەرى بالا سانىنا قاراي ەسەپتەلەدى:

• ءتورت بالاعا – 16،03 اەك نەمەسە 55 303 تەڭگە؛


• بەس بالاعا – 20،04 اەك نەمەسە 69 138 تەڭگە؛


• التى بالاعا – 24،05 اەك نەمەسە 82 972 تەڭگە؛


• جەتى بالاعا – 28،06 اەك نەمەسە 96 807 تەڭگە؛


• سەگىز جانە ودان كوپ بالانىڭ اربىرىنە 28،06 اەك-گە 4 اەك (13 800 تەڭگە) قوسىلىپ وتىرادى.

ونلاين-قىزمەت ارقىلى جاردەماقىنى تاعايىنداۋعا ءوتىنىم بەرۋگە بولادى. 

كوپبالالى وتباسىنا جاردەماقى تاعايىنداۋ كەزىندە وتباسى قۇرامىندا ءتىرى تۋعان، اسىراپ الىنعان، سونداي-اق قورعانشىلىققا الىنعان بالالار، ەگەر ولار باسقا اتا-اناسىنىڭ وتباسىندا ەسكەرىلمەگەن بولسا، جيىنتىق بالالار ەسكەرىلەدى.

بۇل رەتتە وتباسى قۇرامىندا وزدەرىنە قاتىستى اتا-انالارى اتا-انا قۇقىعىنان ايىرىلعان نەمەسە اتا-انا قۇقىعىنان شەكتەلگەن بالالار ەسەپكە الىنبايدى. بالا سانى وزگەرسە، جاردەماقى مولشەرى قايتا ەسەپتەلەدى.

18 جاستان 23 جاسقا دەيىنگى بالالاردىڭ وقۋ ورنىنان انىقتاما سۇرالادى.

«التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان، ءى جانە ءىى دارەجەلى «انا داڭقى» وردەندەرىمەن ماراپاتتالعان كوپبالالى انالارعا اي سايىن 6،4 اەك نەمەسە 22 080 تەڭگە مەملەكەتتىك جاردەماقى تولەنەدى.

حقكو ارقىلى ءوتىنىش بەرۋ:

• ءوتىنىش؛


• جەكە باسىن كۋالاندىراتىن قۇجات؛


• 
  

  «التىن القا»، «كۇمىس القا» القالارىمەن ماراپاتتالعان نەمەسە بۇرىن

  
  

  «باتىر انا» اتاعىن العان، I جانە II دارەجەلى «انا داڭقى» وردەندەرىمەن ماراپاتتالعان كوپبالالى انا اتاعىن العاندىعىن نەمەسە ماراپاتتالعانىن راستايتىن قۇجات؛

  
  


• بايقوڭىر قالاسىنىڭ تۇرعىندارى ءۇشىن – بايقوڭىر قالاسىنىڭ تۇرعىن ءۇي شارۋاشىلىعى ازاماتتاردى ەسەپكە الۋ جانە تىركەۋ ءبولىمىنىڭ انىقتاماسى.

ءوتىنىش بەرۋشىنىڭ قۇجاتتارى مەن بانك شوتىنىڭ ءنومىرى تۋرالى مالىمەتتەرى مەملەكەتتىك اقپاراتتىق جۇيەلەردەن الىنادى.

eGov پورتالى ارقىلى ءوتىنىش بەرۋ:

• ەسق-مەن كۋالاندىرىلعان ءوتىنىش؛


• ماراپاتتالعانىن راستايتىن قۇجاتتىڭ ەلەكتروندى كوشىرمەسى.

№5. جاردەماقى الۋعا ءوتىنىش بەرۋ جولدارى.

• حقكو؛


• eGov پورتالى؛


• ۇيالى بايلانىستىڭ ابونەنتتىك قۇرىلعىسى (پرواكتيۆتى قىزمەت).

پرواكتيۆتى قىزمەت ارقىلى جاردەماقى تاعايىنداۋ ءۇشىن ۇيالى تەلەفون ارقىلى بانك شوتىنىڭ ءنومىرىن راستاۋ نەمەسە ۇسىنۋ تۋرالى حابارلاما جىبەرىلەدى.

مەملەكەتتىك قىزمەت قۇجاتتار تىركەلگەن ساتتەن باستاپ 7 جۇمىس كۇنىندە كورسەتىلەدى.

جاردەماقى تاعايىنداۋ تۋرالى حابارلاما eGov-تا ءوتىنىش بەرۋشىنىڭ جەكە كابينەتىن، SMS-حابارلاما ارقىلى ۇيالى تەلەفونىنا جىبەرىلەدى.

№6. «قازپوشتا» ارقىلى جاردەماقىنى ۇيگە جەتكىزۋ.

«قازپوشتا» بولىمشەلەرى ارقىلى جاردەماقىلار كەلەسى ادامداردىڭ ۇيىنە جەتكىزىلەدى:

• ۇلى وتان سوعىسىنا قاتىسۋشىلارعا جانە وسى كەزەڭدە جارالانۋى، كونتۋزيا الۋى، مەرتىگۋى سالدارىنان نەمەسە اۋرۋعا شالدىعۋى سالدارىنان مۇگەدەكتىگى بار ازاماتتارعا؛


• 80 جاسقا تولعان جاردەماقى الۋشىلارعا؛


• ءى توپتاعى مۇگەدەكتىگى بار ازاماتتارعا؛


• بوگدە ادامنىڭ كۇتىمىنە مۇقتاج ەكەنى جانە دەنساۋلىق جاعدايى بويىنشا بانك وپەراسيالارىنىڭ جەكەلەگەن تۇرلەرىن جۇزەگە اسىراتىن ۇيىمدارعا بارا المايتىنى تۋرالى مەديسينالىق قورىتىندىسى بار ادامدارعا؛


• پوشتا بايلانىسىنىڭ اۆتوماتتاندىرىلعان بولىمشەلەرى بولماعان جاعدايدا اۋىلدىق جەردە تۇراتىن ادامدارعا.

جاردەماقى الۋشىنىڭ بانك شوتىنىڭ ءنومىرى، تۇرعىلىقتى جەرى وزگەرسە حقكو-عا ءتيىستى وزگەرىستەردى راستايتىن قۇجاتتارمەن وسى وزگەرىستەر تۋرالى ءوتىنىش بەرەدى.

№7. جاردەماقىنى توقتاتۋ سەبەپتەرى.

جاردەماقى كەلەسىدەي مالىمەتتەر تۇسكەن ايدان كەيىنگى ايدىڭ ءبىرىنشى كۇنىنەن باستاپ توقتاتىلادى:

• بالا قايتىس بولسا جانە بالانى مەملەكەتتىڭ تولىق قامسىزداندىرۋىنا بەرسە؛


• تاعايىنداۋ ءۇشىن نەگىزدەمەلەر جويىلسا نەمەسە كوپبالالى اناعا بەرىلەتىن جاردەماقى الۋشى قايتىس بولسا؛


• مەملەكەتتىك ناگرادالاردان ايىرىلسا؛


• ق ر ازاماتتىعىن توقتاتۋ فاكتىسى انىقتالسا؛


• ءوتىنىش بەرۋشى جاردەماقىنى زاڭسىز تاعايىنداۋعا الىپ كەلگەن انىق ەمەس مالىمەتتەردى ۇسىنسا؛


• بالا كۇتىمى بويىنشا جاردەماقى الۋشى ءۇشىن مەملەكەتتىك الەۋمەتتىك ساقتاندىرۋ قورىنا الەۋمەتتىك تولەمدەر تۇسسە؛


• كامەلەت جاسقا تولعان بالا وقۋدان شىعارىلسا؛


• اتا-انا قۇقىقتارىنان ايىرىلسا نەمەسە شەكتەلسە؛


• بالا اسىراپ الۋ جارامسىز دەپ تانىلسا نەمەسە ونىڭ كۇشى جويىلسا؛


• قورعانشىلاردى ءوز مىندەتتەرىن اتقارۋدان بوساتىلسا نەمەسە شەتتەتىلسە.

جاردەماقىلاردى قايتا الۋ ءۇشىن ءوتىنىش بەرۋشى جاردەماقىعا قۇقىقتى راستايتىن قۇجاتتاردى قوسا وتىرىپ ءوتىنىش بەرەدى.

اقپارات informburo.kz-تەن الىندى.