شاعىن مۇناي وڭدەۋ زاۋىتتارىنا قويىلاتىن تالاپتار كۇشەيتىلەدى.
بۇل جايىندا تاراتىلعان ءماجىلىستىڭ دەپۋتاتتارىنىڭ ساۋالىنا ەنەرگەتيكا ءمينيسترى بولات اقشولاقوۆتىڭ جاۋابىندا ايتىلعان، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«مۇناي جانە گاز اقپاراتتىق-تالداۋ ورتالىعىنىڭ اقپاراتى بويىنشا، 2022 جىلى شاعىن موز-دەر 840،1 مىڭ توننا مۇناي وڭدەگەن. ونىڭ ىشىندە وندىرىلەتىن ءونىمنىڭ 80 پايىزدان استامى موتور وتىنىنىڭ تالاپتارىنا سايكەس كەلمەيتىن جانە قازاقستان رەسپۋبليكاسىنان تىس جەرلەرگە ەكسپورتتالاتىن مۇناي ونىمدەرى بولىپ تابىلادى. وسىعان بايلانىستى قۋاتى از مۇناي ونىمدەرىن وندىرۋشىلەردى ىشكى نارىققا ودان ءارى جەتكىزۋ ارقىلى موتور وتىنىن شىعارۋدى ۇلعايتۋعا ىنتالاندىرۋ قاجەت. سونىمەن قاتار قازاقستان رەسپۋبليكاسىنىڭ وتىن-ەنەرگەتيكالىق كەشەنىن دامىتۋدىڭ 2022-2026 جىلدارعا ارنالعان تۇجىرىمداماسىن ىسكە اسىرۋ جونىندەگى ءىس-قيمىل جوسپارىنا سايكەس، شاعىن موز-گە قويىلاتىن تالاپتاردى كۇشەيتۋ بويىنشا زاڭعا تۇزەتۋلەر قابىلداۋ كوزدەلىپ وتىر»، - دەدى مينيستر جاۋابىندا.
ونىڭ اتاپ وتۋىنشە، زاڭعا تۇزەتۋلەر ازىرلەۋگە ەنەرگەتيكا، ۇلتتىق ەكونوميكا جانە ادىلەت مينيسترلىكتەرى، «قازمۇنايگاز» ۇك» اق جانە «KAZENERGY» زتب جاۋاپتى.
«وسىعان بايلانىستى مينيسترلىك سۇرانىسقا يە مۇناي ونىمدەرىنىڭ تۇرلەرىن (مىسالى، جيىنتىعىندا ءونىمنىڭ جالپى كولەمىنىڭ كەمىندە 45 پايىزى بەنزين، ديزەل وتىنى، كەروسين، بيتۋم) مىندەتتى ءوندىرۋ جانە ءموز سيپاتتامالارىن ءتيىستى ساراپتامالارمەن جانە قورىتىندىلارمەن راستاۋ قاجەتتىلىگى بويىنشا زاڭعا تۇزەتۋلەر دايىندادى»، - دەدى بولات اقشولاقوۆ.