كوپشىلىگىمىز ۇيقىسىزدىق تەك زيان دەپ ويلايمىز. الايدا كەي جاعدايدا ونىڭ پايدالى جاعى دا بولۋى مۇمكىن.
ۇيقىسىزدىقتىڭ اعزاعا تيگىزەتىن كەرى اسەرى ءجيى ايتىلىپ ءجۇر. ءبىراق سوڭعى زەرتتەۋلەر مەن ساراپشىلاردىڭ پىكىرىنشە، ءبىر ءتۇن ۇيىقتاماۋدىڭ دا وڭ اسەرى بولۋى مۇمكىن.
بريتاندىق دارىگەر ءارى Sleepyhead كلينيكاسىنىڭ نەگىزىن قالاۋشى ستەفاني روميشيەۆسكي Infobae باسىلىمىنا بەرگەن سۇحباتىندا ۇيقىنىڭ جەتىسپەۋشىلىگىنە قاتىستى تىڭ پىكىر ءبىلدىردى. ونىڭ ايتۋىنشا، ءبىر ءتۇن ۇيىقتاماۋ دوفامين دەڭگەيىنىڭ ۋاقىتشا كوتەرىلۋىنە سەبەپ بولادى. بۇل – ادامنىڭ قۋاتتانىپ، كوڭىل-كۇيىنىڭ جاقسارۋىنا، زەيىننىڭ ارتۋىنا جانە شىعارماشىلىق ويلاۋ قابىلەتىنىڭ بەلسەنۋىنە اسەر ەتەدى.
«كەيدە ادەيى ۇيىقتاتپاۋ ءادىسى دەپرەسسيانى ەمدەۋ كەزىندە قولدانىلادى. سەبەبى بۇل كوڭىل-كۇيدى جاقسارتىپ، ادامعا ۋاقىتشا سەرگەكتىك بەرەدى»، – دەيدى دارىگەر.
دەگەنمەن ستەفاني روميشيەۆسكي بۇل ءادىستى ۇزاق مەرزىمدى ستراتەگيا رەتىندە قولدانۋعا بولمايتىنىن ەسكەرتەدى. بۇل – تەك ءبىر رەتتىك پسيحولوگيالىق كومەك قۇرالى عانا.
ال سومنولوگ كەيتلين چەيسسەر ۇيقىنىڭ ماڭىزدىلىعىن العا تارتادى. ول تۇنگى دەمالىستىڭ جەتىسپەۋى تەرىنىڭ جاعدايىنا كەرى اسەر ەتىپ، بەزەۋدىڭ پايدا بولۋىنا سەبەپ بولاتىنىن ايتادى.
ۇيقىسىزدىقتىڭ زيانى تۋرالى كوپ ايتىلعانىمەن، كەيبىر ەرەكشە جاعدايلاردا ونىڭ بەلگىلى ءبىر پايداسى بولۋى مۇمكىن. دەگەنمەن، بۇل – تۇراقتى تاجىريبە ەمەس، تەك ۋاقىتشا جاعداي رەتىندە قاراستىرىلۋى ءتيىس. ۇيقى – ادامنىڭ فيزيكالىق جانە پسيحيكالىق ساۋلىعى ءۇشىن وتە ماڭىزدى.