قاۋىپسىزدىك قاپەردەن شىقپاسىن: الماتىلىق دارىگەرلەر اتا-انالار مەن بالالارعا قاۋىپسىزدىك ەرەجەلەرىن ۇيرەتتى
وڭىرلىك كوممۋنيكاسيالار قىزمەتىندە، بالالارعا جەدەل مەديسينالىق كومەك ورتالىعىنىڭ قابىلداۋ ءبولىمىنىڭ مەڭگەرۋشىسى، بالالار حيرۋرگى جانە تراۆموتولوگ مەيىرجان قۇرمانالييەۆ بالالاردى وقىس وقيعادان قالاي جانە ءقايتىپ قورعاۋعا بولاتىنىن ايتىپ بەردى، دەپ حابارلايدى aqshamnews.kz.
«بالالاردىڭ جاراقات الۋى دا جاسىنا قاراي بولادى. مەكتەپكە دەيىنگى جاستاعىلارى كوبىنە ەرەسەكتەر دۇرىس قاراماعاندىقتان جازىم بولىپ قالىپ جاتسا، وقۋشىلار جاعى ويناپ ءجۇرىپ، بىرنارسەنى ۇستايمىن دەپ ءجۇرىپ جاراقات الىپ جاتادى»، - دەيدى مەيىرجان قۇرمانالييەۆ.
وسىعان قاراعاندا، جاراقات العانداردىڭ كوبى - وقۋشىلار. وعان مەكتەپكە بارعانى، ۇلكەندەردىڭ باقىلاۋسىز جىبەرىپ العانى سياقتى بىرنەشە سەبەپ تۇرتكى بولادى. ماماننىڭ ايتۋىنشا، اۋلادا ءجۇرىپ، ويىن ويناپ، سپورتپەن اينالىسىپ ءجۇرىپ العان جاراقات ءبىرىنشى ورىندا تۇر.
بالالاردىڭ جاراقاتتانىپ قالۋىنىڭ نەگىزگى سەبەپتەرى:
بالاعا قاراماعاننان (45 %)؛
بالانىڭ بايقاماي جاراقات الۋى (25 پايىز)؛
وقىس وقيعا (2%)؛
جول-كولىك وقيعاسى مەن باسقا دا سەبەپتەر.
الماتى قالاسىنداعى بالالار اۋرۋحانالارىنىڭ قابىلداۋ بولىمدەرىنە (№ 2 قالالىق بالالار كلينيكالىق اۋرۋحاناسى مەن بالالارعا جەدەل مەديسينالىق كومەك ورتالىعى) ءبىر جىل ىشىندە 104 مىڭنان استام ناۋقاس جەدەل مەديسينالىق كومەككە جۇگىندى، ونىڭ ىشىندە 21،8 مىڭى نەيروحيرۋرگيا جانە 48 مىڭعا جۋىعى تراۆماتولوگيا بويىنشا. نەيروحيرۋرگيالىق دياگنوزبەن 3،3 مىڭ ناۋقاس اۋرۋحاناعا جاتقىزىلسا، 3،9 مىڭعا جۋىعى جاراقات العان. كۇيىك العان 1،6 مىڭ ادام كومەككە جۇگىنىپ، ونىڭ 1 مىڭنان استامى اۋرۋحاناعا جاتقىزىلدى. وسى جىلدىڭ بەس ايىندا الماتى قالالىق بالالارعا جەدەل مەديسينالىق كومەك ورتالىعىنىڭ قابىلداۋ بولىمىنە 19،6 مىڭ بالا ءتۇستى.
«ءبىزدىڭ دارىگەر-تراۆماتولوگتار كۇندەلىكتى ءارتۇرلى جاستاعى بالالاردىڭ اتا-اناسىمەن كەزدەسىپ، بالانى جاراقاتتانىپ قالۋدان قالاي قورعاۋعا بولاتىنىن ايتىپ، ءدارىس وقيدى. تراۆماتولوگيا ءبولىمىنىڭ كەشەندى جۇمىس جوسپارىنىڭ اياسىندا پاسيەنتتەرگە، ولاردىڭ اتا-اناسىنا ارناپ ساۋات اشاتىن سەميناردى دا قوسا وتكىزىپ جاتىرمىز»، - دەپ تولىقتىردى مامان.
بالالار جاراقاتتانىپ قالماس ءۇشىن دارىگەردىڭ اتا-انالارعا بەرگەن كەڭەسى:
جول قاۋىپسىزدىگى تۋرالى بالالارمەن ۇنەمى اڭگىمەلەسۋ كەرەك؛
شۇعىل كومەك قىزمەتىنىڭ ءنومىرى ىڭعايلى جەردە جازۋلى تۇرسىن؛
بالاڭىزعا قاۋىپسىزدىك ەرەجەسىن ءتۇسىندىرىڭىز؛
دارى-دارمەكتى بالانىڭ قولى جەتپەيتىن جەردە ۇستاڭىز؛
سۋدىڭ ماڭىندا بالانى قاراۋسىز قالدىرماڭىز.