ۇيقىڭىزدى قاندىرىپ ءجۇرىڭىز!

ۇنەمى ۇيقىسى قانباي جۇرەتىن ادام اشۋلانشاق، ارتىق سالماق جيناۋعا بەيىم بولادى.

ەڭ قورقىنىشتىسى – ۇيقىنىڭ قانباۋى سالدارىنان جۇيكە جۇيەسىنىڭ جاسۋشالارى جاڭارمايدى ەكەن، ول ازداي، ادامنىڭ ەستە ساقتاۋى مەن زەيىنى، جۇمىس ىستەۋ قابىلەتى دە ناشارلايدى.

ديەتولوگ ءارى جاتتىقتىرۋشى سۆەتلانا پانچەنكو ۇيقىنىڭ قانباۋىنىڭ اعزاعا تيگىزەتىن زيانى تۋرالى ايتتى.

«تاۋلىكتىك ىرعاقتىڭ بۇزىلۋى (ۇيىقتاۋ مەن ويانۋ رەجيمدەرى) ءبىرقاتار ماڭىزدى گورمونداردىڭ ءتۇزىلۋى مەن رەتتەلۋىندەگى بۇزىلۋلارعا تىكەلەي بايلانىستى. ەگەر ءسىز كەشكى ون بىردەن كەيىن ۇيىقتاساڭىز نەمەسە تىم از ۇيىقتايتىن بولساڭىز، وندا كورتيزولدىڭ، مەلاتونين سەكرەسياسى (ۇيقى گورمونى)، ءوسۋ گورمونىنىڭ سەكرەسياسى، تابەتتى رەتتەيتىن گورموندار: لەپتين (قانىقتىرۋ گورمونى)، گرەليننىڭ (اشتىق گورمونى) رەتتەلۋى بۇزىلادى. بۇل گورمونداردىڭ تەپە-تەڭدىگى ءسىزدىڭ دەنساۋلىعىڭىز بەن يممۋنيتەتىڭىزگە ايتارلىقتاي زيانىن تيگىزەدى»، – دەدى مامان.

ول كورتيزول، لەپتين جانە گرەليندەگى تەڭگەرىمسىزدىكتىڭ ىسىنۋگە، اشۋلانشاقتىققا، كوڭىل-كۇيدىڭ وزگەرۋىنە جانە تاتتىلەرگە، مايلى جانە زياندى تاعامدارعا قۇمارلىقتىڭ ارتۋىنا اكەلەتىنىن ايتتى.

«ءاردايىم ۋاقىتىندا ۇيىقتاۋ كەرەك، ەڭ دۇرىسى 22-22: 30-دا جاتىپ قالعان ءجون، ۇيىقتايتىن جەرىڭىز پەردەسى جارىق وتكىزبەيتىن، تولىق قاراڭعىلانعان بولمە بولۋى دا ماڭىزدى. ۇلكەن ادام كەم دەگەندە سەگىز ساعات ۇيىقتاۋى كەرەك. بالالاردىڭ 9-10 ساعات ۇيىقتاعانى ءجون»، - دەدى ديەتولوگ.