ۇكىمەت وتىرىسىندا «اۋىل – ەل بەسىگى» جوباسىنىڭ ىسكە اسىرىلۋ بارىسى قارالدى
بيىل 27 قازاننان باستاپ ق ر پرەمەر-مينيسترى اسقار ءماميننىڭ تاپسىرماسى بويىنشا ورتالىق مەملەكەتتىك ورگانداردىڭ باسشىلارى اۋىلدىق ەلدى مەكەندەردەگى ينفراقۇرىلىمدى جاڭعىرتۋ بارىسىن باقىلاۋ ماقساتىندا وڭىرلەرگە ينسپەكسيالىق ساپارلاردى باستادى، دەپ حابارلايدى Almaty-akshamy.kz
قازاقستاندا اۋىل حالقىنىڭ 89%-ى تۇراتىن 3561 پەرسپەكتيۆالى اۋىل (1173 تىرەك جانە 2388 سەرىكتەس) ايقىندالدى. 2019-2021 جىلدارى «اۋىل – ەل بەسىگى» جوباسى، سونداي-اق جۇمىسپەن قامتۋ جول كارتاسى، «نۇرلى جول» جانە «نۇرلى جەر» باعدارلامالارى بويىنشا جانە جەكە ينۆەستيسيالار ەسەبىنەن اۋىلدىق اۋماقتاردى دامىتۋعا 1،2 ترلن تەڭگە باعىتتالدى. تكش، كولىك، ءبىلىم بەرۋ، دەنساۋلىق ساقتاۋ، مادەنيەت جانە سپورت سالالارىندا 12 مىڭنان استام جوبا ىسكە اسىرىلدى، 6،5 مىڭ جوبا ىسكە اسىرىلۋ ساتىسىندا.
الداعى ءتورت جىلدا «اۋىل – ەل بەسىگى» جوباسىن قارجىلاندىرۋ كولەمى 800 ملرد تەڭگەگە دەيىن ۇلعايادى، ال بارلىق قارجى كوزدەرىن ەسكەرە وتىرىپ، اۋىلداردى جاڭعىرتۋعا 1،3 ترلن تەڭگە جوسپارلانعان. 2025 جىلعا قاراي اۋىلدىق جەرلەر 100% سۋمەن جابدىقتاۋ قىزمەتتەرىمەن قامتاماسىز ەتىلەدى، 10 مىڭ شاقىرىم كەنتىشىلىك جولداردىڭ جاي-كۇيى جاقسارتىلادى، 12 مىڭ شاقىرىم ينجەنەرلىك جەلى، بىرنەشە مىڭ الەۋمەتتىك ينفراقۇرىلىم وبەكتىسى سالىنادى جانە جوندەلەدى، 5 مىڭ اۋىل مەكتەبى جاڭعىرتىلادى.
اوك سالاسىندا 4،5 ترلن تەڭگە سوماسىنا 1 مىڭعا جۋىق جوبا ىسكە اسىرىلادى. اۋىل شارۋاشىلىعىنداعى ەڭبەك ونىمدىلىگى 2،5 ەسە ارتادى، قايتا وڭدەلگەن ءونىم ۇلەسىن 70%-عا دەيىن جەتكىزە وتىرىپ، اوك ونىمدەرىنىڭ ەكسپورتى 2 ەسە ارتادى. 1 ملن اۋىل تۇرعىنىنىڭ تابىسى ارتادى، اۋىل شارۋاشىلىعىندا 500 مىڭ جۇمىس ورنى قۇرىلادى. بيىل 29 قازاندا ق ر پرەمەر-مينيسترى اسقار مامين اقمولا وبلىسىنا جۇمىس ساپارى بارىسىندا «اۋىل – ەل بەسىگى» جوباسىنىڭ ىسكە اسىرىلۋىن تەكسەردى.
«مەملەكەت باسشىسى قاسىم-جومارت توقايەۆ «اۋىل – ەل بەسىگى» جوباسىن ىسكە اسىرۋعا جانە اۋىلدىق ەلدى مەكەندەردەگى تۇرمىس ساپاسىن ارتتىرۋعا كوپ كوڭىل بولەدى. ۇكىمەت مۇشەلەرى «اۋىل – ەل بەسىگى» جوباسىنىڭ جانە اۋىل ايماقتارىن دامىتۋدىڭ باسقا دا باعدارلامالارىنىڭ ورىندالۋىن باقىلاۋ بويىنشا ەلىمىزدىڭ بارلىق وڭىرىنە ينسپەكسيالىق ساپارلاردى باستادى. اۋىلدىق جەرلەردە ينفراقۇرىلىمدى جاڭعىرتۋ بويىنشا جوبالاردى ىسكە اسىرۋ قارقىنى ەرەكشە باقىلاۋدا»، — دەدى ا. مامين.