الەمدەگى الپاۋىت ەلدەردىڭ كەلەلى جيىنى بولماق
«ۇلكەن جيىرمالىق» ەلدەرى پاندەميادان كەيىنگى العاشقى ءسامميتىن وتكىزەدى، دەپ حابارلايدى Almaty-akshamy.kz
يتاليا استاناسى وسىعان قىزۋ دايىندالىپ جاتىر. كەزدەسۋ ەرتەڭ باستالادى. ءبىراق جۇڭگو مەن رەسەي باسشىلارى ونلاين قاتىسادى. ال وسىمەن 16-شى مارتە ۇيىمداستىرىلىپ وتىرعان باسقوسۋدىڭ باستى تاقىرىپتارى - پاندەميادان كەيىنگى الەمدىك ەكونوميكانى قالپىنا كەلتىرۋ مەن كليماتتىڭ وزگەرۋىمەن كۇرەس.
سونىمەن قاتار يراننىڭ يادرولىق باعدارلاماسى دا قارالادى. شوتلانديانىڭ گلازگو قالاسىنداعى كليماتتىڭ وزگەرۋىمەن كۇرەس بويىنشا حالىقارالىق كونفەرەنسيا الداعى جەكسەنبىدە باستالادى.
شاراعا 200-دەن استام ەلدىڭ وكىلدەرى قاتىسادى. كەزدەسۋدە 2015 جىلى عالامدىق جىلىنۋمەن كۇرەس بويىنشا پاريج كەلىسىمشارتىنا قول قويىلعاننان كەيىن اتقارىلعان ءىس-شارالار مەن كەلەشەكتە قولعا الىناتىن باستامالار تالقىلانادى.
ماقسات - اۋاعا كومىرقىشقىل گازىن شىعارۋ مولشەرىن ازايتىپ، كليماتتىڭ جىلىنۋىن توقتاتۋ. كەزدەسۋ الدىندا تابيعاتتى قورعاۋشىلار دا بەلسەندىلىك تانىتىپ، ءتۇرلى شەرۋلەر ۇيىمداستىرىپ جاتىر.
«ءقازىر الەمنىڭ كوپ ەلىندە كليماتتىق توتەنشە جاعداي ورناعان. ورمان ءورتى، سۋ تاسقىنى كوبەيدى. الەم باسشىلارى مۇنىڭ بارلىعىن بىلەدى. سوندىقتان ولار گلازگودا كليماتتىڭ وزگەرۋىنە بايلانىستى اپاتتى جاعدايدىڭ تۋىنداۋىنىڭ الدىن الۋ ءۇشىن ناقتى شارالار قابىلداۋى كەرەك»، - دەدى Glasgow Actions ۇيىمىنىڭ باسشىسى ەندريۋ نازدين.