ۋيلل سميت جۇرگىزۋشى تاراپىنان ايەلىنە قاتىستى ايتىلعان ازىلگە اشۋلانعان بولاتىن
وسكار» جۇلدەسىن تاپسىرۋ سالتاناتىندا جۇرگىزۋشى كريس روكتى ۇرىپ جىبەرگەن ۋيلل سميت امەريكا كينەماتوگرافيالىق ونەر جانە عىلىم اكادەمياسىنان شىعاتىنىن مالىمدەدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ۋيلل سميت پەن كريس روك اراسىنداعى كەلەڭسىزدىكتەن كەيىن اتالعان ۇيىم اكتەردىڭ ءتارتىبى قارالاتىنىن جاريالاعان بولاتىن.
«سميت اكادەميانىڭ ءتارتىپ ستاندارتتارىن بۇزدى. ءبىز ونىڭ ماسەلەسىن 18 ساۋىرگە جوسپارلانعان ديرەكتورلار كەڭەسى وتىرىسىندا قارايمىز»، – دەگەن ەدى اكادەميا پرەزيدەنتى ديەۆيد رۋبين.
مۇنان سوڭ اكتەر ۇيىم قۇرامىنان ءوز ەركىمەن شىعاتىنىن جانە باسقارما قابىلداعان كەز كەلگەن شەشىمدى قابىلدايتىنىن ءمالىم ەتتى.
«وسكاردىڭ» 94 سالتاناتىنداعى قىلىعىم جاعا ۇستاتارلىق بولدى. كەشىرىلمەيتىن جايت. كريسقا عانا ەمەس، ونىڭ وتباسىنا، مەنىڭ كوپتەگەن دوستارىم مەن جاقىندارىما، سالتاناتقا، اۋقىمدى اۋديتورياعا اۋىر ءتيدى. اكادەميانىڭ سەنىمىن اقتامادىم. جەتىستىكتەرىمەن كوزگە تۇسكەن وزگە نومينانتتاردىڭ مەرەكەلىك كوڭىل كۇيىن بۇزدىم»، –دەيدى ول.
ايتا كەتەيىك، ۋيلل سميت جۇرگىزۋشى تاراپىنان ايەلىنە قاتىستى ايتىلعان ازىلگە اشۋلانعان بولاتىن. الوپەسيا اۋرۋىنا شالدىققان دجادا پينكەتت-سميت شاشى ءتۇسىپ قالعاندىقتان، باسىن تاقىرلاپ تاستاۋعا ءماجبۇر بولعان. ۋ.سميت كينوجۇلدىزدار، رەجيسسەرلەر مەن پروديۋسەرلەردىڭ باسىن بىرىكتىرگەن تانىمال ۇيىمنان شىعاتىن بولسا، ول «وسكار» سىيلىعىنا ۇمىتكەر فيلمدەر مەن سپەكتاكلدەرگە داۋىس بەرە المايدى. الايدا ونىڭ جۇمىستارى جۇلدەگە ۇسىنىلاتىن تىزىمنەن شەتتەتىلمەيدى.