ۇيىندە قارۋ جاسىرعان تاعى ءبىر الماتىلىق ۇستالدى

قارۋدان بولەك، ونىڭ ۇيىنەن سينتەتيكالىق ەسىرتكى تابىلدى.

ۇيىندە مەفەدرون مەن ماكاروۆ تاپانشاسىن جاسىرعان الماتىلىق جىگىت ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

ەسىرتكى ساتۋشىسىن ۇستاۋ بويىنشا ارنايى ءىس-شارانى ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى پوليسيانىڭ ارنايى جاساقتارىنىڭ كومەگىمەن جۇرگىزدى.

«جەدەل ىزدەۋ ءىس-شارالارىن جۇرگىزۋ بارىسىندا 26 جاستاعى گ.ەسىمدى ازامات ۇستالدى. ونىڭ تۇرعىلىقتى جەرىندە رۇقسات ەتىلگەن ءتىنتۋ كەزىندە، ودان اق ءتۇستى ۇنتاق زاتى بار ەكى پوليەتيلەن بۋما جانە ءتورت پاتروندارى بار ماكاروۆ تاپانشاسى تابىلىپ، تاركىلەندى. ساراپتاما قورىتىندىسىنا سايكەس، بۇل زات - “مەفەدرون” سينتەتيكالىق ەسىرتكىسى.  مامانداردىڭ ايتۋىنشا، تاركىلەنگەن تاپانشا ۇڭعىسىن اۋىستىرۋ ارقىلى وق اتۋعا ارنالعان اتىس قارۋى بولىپ ەسەپتەلەدى. قارۋ اتۋعا جارامدى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

اتالعان دەرەك بويىنشا قىلمىستىق ءىس  ق ر قك-نىڭ 297-بابى 1-بولىمىنە سايكەس تەرگەلىپ جاتىر. كۇدىكتى ۋاقىتشا ۇستاۋ يزولياتورىنا قامالدى.