ادام ومىرىنە اراشا تۇسەتىن دارىگەرلىك ماماندىقتى تاڭداۋ - ۇلكەن جاۋاپكەرشىلىك. سەبەبى، دارىگەر ادام اناتومياسىن وتە تەرەڭ بىلۋمەن قاتار، كەز كەلگەن جاعدايداعى ناۋقاستان جيىركەنبەيتىن، قاننان قورىقپايتىن، ادام تاعدىرىنا نەمقۇرايلى قارامايتىن، ءتوزىمدى، جۇيكەسى مىقتى جان بولۋى كەرەك.
سونداي جانداردىڭ ءبىرى – الماتى قالاسى قىلمىستىق اتقارۋ جۇيەسى دەپارتامەنتىنە قاراستى №11 مەكەمەسىندەگى ەمدەۋ ءبولىمىنىڭ باسشىسى، ادىلەت مايورى ديلنارا راشيدين قىزى.
№11 مەكەمەسىندە، ياعني جاسوسپىرىمدەر كولونياسىندا، قازىرگى كۇنى كامەلەتكە تولماعان 36 ءجاسوسپىرىم جازاسىن وتەپ جاتىر. مەكەمەدە 6 ورىندىق مەديسينالىق ءبولىم جانە وكپە اۋرۋىنا ارنالعان وقشاۋلاۋ ورنى بار، 17 اق حالاتتى ابزال جان جۇمىس ىستەيدى.
مەديسينالىق ءبولىم باسشىسى ديلنارا نۋردينوۆانىڭ ايتۋىنشا، مەديسينا ءبولىمىنىڭ قىزمەتكەرلەرى مەكەمەگە كەلىپ تۇسكەن سوتتالعاندارعا تۇراقتى مەديسينالىق كومەك كورسەتىپ، سونىمەن قاتار جىلىنا ەكى رەت جوسپارلى تۇردە پروفيلاكتيكالىق تەكسەرۋدەن وتكىزىپ تۇرادى. الماتى قالاسىنداعى №24 قالالىق ەمحانامەن تىعىز بايلانىستا، پروفيلاكتيكالىق تەكسەرۋ جۇرگىزۋ كەزىندە سول مەكەمەدەن لور، حيرۋرگ، نيەۆروپاتولوگ، تەراپيەۆت، وكۋليست ماماندار شاقىرتىلادى.
مەكەمەدەگى سوتتالعاندار اراسىندا سوزىلمالى اۋرۋ انىقتالعان ناۋقاستار مەديسينا ءبولىمىنىڭ قىزمەتكەرلەرىمەن ۇنەمى قاداعالانىپ، ۋاقىتىلى دارى-دارمەكتەر بەرىلىپ، قاجەت بولعان جاعدايدا الماتىنىڭ اۋرۋحانالارىنان ارنايى مامان-دارىگەرلەر شاقىرىلىپ، قوسىمشا تەكسەرۋ جۇمىستارى جۇرگىزىلىپ، قورىتىندى دياگنوز قويىلىپ، قاجەتتى ەم الىنادى. مەكەمەدە ارنايى ستوماتولوگيا كابينەتى بار، ءتىسى اۋىرعان سوتتالعاندارعا ەم كورسەتۋ ءۇشىن مەديسينالىق قۇرال-جابدىقتارمەن تولىقتاي جابدىقتالعان.
– ەڭبەك ەتپەي باقىتتى ءومىر ءسۇرۋ مۇمكىن ەمەس. ال جانىڭ سۇيەتىن ءىس وزگەلەرگە پايدالى بولسا، ودان اسقان باقىت جوق شىعار. باتىلدىق، جان جىلۋى، وزگەلەرگە جاردەم بەرۋ – بارلىق دارىگەرگە ءتان قاسيەت. دارىگەرلەر جۇرەگىندە گيپپوكرات انتىنا ءاردايىم ادال بولادى. جاس ماماندارعا دا سولاي بولۋدى تىلەيمىن. ول ءۇشىن كوپ ىزدەنىپ، كوپ ەڭبەكتەنۋ كەرەك، – دەيدى ديلنارا راشيدين قىزى.
ايەل ادامعا جۇمىس پەن وتباسىن قاتار الىپ ءجۇرۋ استە وڭاي ەمەس. ونىڭ ۇستىنە ءبىزدىڭ كەيىپكەرىمىز جابىق مەكەمەدە، ياعني باس بوستاندىعىنان ايىرىلعان جاستار وتىرعان كولونيادا 26 جىلدان بەرى ەڭبەك ەتىپ كەلەدى. جاۋاپكەرشىلىك ۇلكەن. ءبىراق ول بارىنە ۇلگەرۋگە تىرىسادى. وتباسىنىڭ ۇيىتقىسى، ەكى ۇلدىڭ اياۋلى اناسى.