10 ماۋسىمدا، ياعني، الداعى سەنبى كۇنى «Almaty Arena» سارايىندا جۇدىرىقتاسۋدان العاش رەت ەرەكشە شوۋ وتەدى.
كەشتىڭ ۇيىمداستىرۋشىسى - قازاقستانداعى العاشقى كاسىبي «Nomad Fighting Championship» ليگاسى. جارىس الدىندا سپورتشىلار كەزدەسىپ، باسپا ءسوز جيىنىن وتكىزدى. كەشتىڭ باستى كەزدەسۋى مۇراتبەك قاسىمباي مەن نيكيتا ءسولونيننىڭ اراسىندا وتەدى، دەپ حابارلايدى Almaty-akshamy.kz
ال جارتىلاي ورتا سالماقتا كوپتەن كۇتكەن فينالدىق كەزدەسۋ بولادى دەپ جوسپارلانعان. باستى سىيلىق - چەمپيوندىق بەلبەۋ جانە 5 000 000 تەڭگە.
«نيكيتا - كاسىپقوي سپورتشى. مەن ونىڭ مۇمكىندىكتەرىن باعالايمىن. ءبىراق مەن دە بابىمدامىن. جەڭىسكە دەگەن سەنىم باسىم. «Nomad-تىڭ» ءبىرىنشى ستاديوندىق تۋرنيرىندە ونەر كورسەتەتىنىمە قۋانىشتىمىن. وعان قوسا كەشتە تانىمال ەسترادا جۇلدىزدارى مەن ەتنوگرافيالىق توپ كورەرمەنگە كوتەرىڭكى كوڭىل-كۇي سىيلايدى. كەلۋشىلەرگە دە توسىنسىي ازىرلەنگەن. كەشكە كەلگەن قوناقتار اراسىندا 1 000 000 تەڭگە ويناتىلادى»، - دەيدى قازاقستاندىق جەكپە-جەك شەبەرى مۇراتبەك قاسىمباي.
«ءبىر جىلدا كەم دەگەندە ەكى رەت ۇلكەن ارەنالاردا وتكىزىپ تۇرۋ، حالىقارالىق ارەناعا شىعۋ، وزبەكستانعا، قىرعىزستانعا، ورتا ازياعا بارۋ، ءبىزدىڭ قازاقستاندىق سپورتشىلاردىڭ كورسەتكىشىن كورسەتۋ، ءبىزدىڭ سپورتتىق يندۋستريانى دامىتۋ دەگەن ماقساتتارمەن وسى تۋرنيرلەردى وتكىزىپ ءجۇرمىز»، - دەيدى «Nomad Fighting Championship» ليگاسىنىڭ پرەزيدەنتى مۇحامەدجان قونىسبەكوۆ،
جوبانىڭ تاعى ءبىر ەرەكشەلىگى بيلەت ساتىلىمىنان تۇسكەن قارجىنىڭ 10 پايىزى مۇقتاج جاندارعا ءۇي ساتىپ الۋ ماقساتىندا قايىرىمدىلىق قورعا اۋدارىلادى. ەندەشە 10 ماۋسىم كۇنى كەشكى بەستە «الماتى ارەناعا» اسىعىڭىز!