قازاقستان فۋتبول فەدەراسياسىنىڭ پرەزيدەنتىنە ۋەفا نە ءۇشىن نارازى؟
ەۋروپالىق فۋتبول قاۋىمداستىقتارى وداعى (ۋەفا) قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆتىڭ قۇپيا اقپاراتتى جاريا ەتۋىنە بايلانىستى رەنىشىن ءبىلدىردى، دەپ حابارلايدى aqshamnews.kz.
بارمەنقۇلوۆتىڭ ۋەفا-عا مۇشە ەلدەردىڭ جارتىسىنان كوبى رەسەيدىڭ جاستار قۇرامالارىن حالىقارالىق تۋرنيرلەرگە قايتا قاتىستىرۋدى قولدايتىنى تۋرالى مالىمدەمەسى ۇيىم تاراپىنان رەنىش تۋدىردى.
«توپتىق وتىرىستاردىڭ ءبىرى ەۋروپالىق فۋتبولعا ساياساتتىڭ اسەرى تۋرالى بولدى، وندا گەوساياسي ماسەلەلەر مەن وزەكتى تاقىرىپتار تالقىلاندى. ءبىز سەنىمدىلىك بۇزىلعانىنا، ءارى دۇرىس ەمەس اقپارات جاريالانعانىنا رەنجۋلىمىز. بۇل ارەكەت بىرەۋدىڭ ساياسي ۇپاي جيناۋ ءۇشىن جاساعانى ايقىن»، — دەپ مالىمدەدى ۋەفا باسپا ءسوز قىزمەتى تاسس اگەنتتىگىنە سىلتەمە جاساي وتىرىپ.
ەسكە سالا كەتەيىك، وسىدان بۇرىن قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ۋەفا-عا مۇشە ەلدەردىڭ جارتىسىنان استامى رەسەيگە قاتىستى سانكسيالاردى جەڭىلدەتۋدى قولداۋعا دايىن ەكەنىن ايتقان بولاتىن.
2022 جىلدىڭ اقپان ايىنان بەرى فيفا جانە ۋەفا رەسەيدىڭ كلۋبتارى مەن قۇرامالارىن ۋكرايناداعى جاعدايعا بايلانىستى حالىقارالىق تۋرنيرلەردەن شەتتەتكەن بولاتىن.