ۇبت باستالعاننان بەرى 127 مىڭ رەتتەن استام تەست تاپسىرىلدى.
ونىڭ ىشىندە تالاپكەرلەردىڭ 74%-ى قازاق تىلىندە، 26%-ى ورىس تىلىندە، 0،1% اعىلشىن تىلىندە تەستىلەۋدەن ءوتتى، دەپ حابارلايدى Almaty-akshamy.kz.
عىلىم جانە جوعارى ءبىلىم مينيسترلىگىنىڭ اقپاراتى بويىنشا، ۇبت باستالعالى شەكتى بالدى 78% - عا جۋىق تالاپكەر جينادى. ورتاشا بالعا كەلەتىن بولساق، ول 69 بالدى قۇرادى. ەڭ جوعارى بالل – 137، ونى تەستىلەۋدىڭ ءبىرىنشى اپتاسىندا ءبىر تالاپكەر جيناعان.
«ۇبت-نىڭ ءۇشىنشى اپتاسىندا تالاپكەرلەر تەستىلەۋدى تاپسىرۋدىڭ ەكىنشى مۇمكىندىگىن پايدالانىپ جاتىر. سوندىقتان تەستتى ەكى رەت تاپسىرىپ، بالدارىن ءبىلىپ وتىرعان بالالار گرانت كونكۋرسى بويىنشا سۇراقتار قويا باستادى. ەڭ ءجيى قويىلاتىن سۇراق: گرانت ۇتىپ الۋ ءۇشىن قانشا بالل جيناۋ كەرەك؟ گرانتقا شەكتى بالل دەگەن بولمايدى جانە بارلىعى كونكۋرسقا بايلانىستى ەكەندىگىن تاعى دا ءبىر اتاپ وتسەم. ءبىراق كەم دەگەندە باعدار بولۋ ءۇشىن وقۋعا تۇسۋشىلەر بىلتىرعى ناتيجەلەرمەن تانىسا الادى. مىسالى، 2022 جىلى «ستوماتولوگيا» ببت بويىنشا ءبىر گرانتتىق ورىنعا 25 ۇمىتكەر بولعان، ال گرانت ۇتىپ العانداردىڭ ورتاشا كورسەتكىشى 134 بالدى قۇرادى»، - دەپ اتاپ ءوتتى ق ر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ايتا كەتەيىك، ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ەكى اپتانىڭ ىشىندە 370 تالاپكەر قاتىستى.
بۇگىنگى تاڭدا 146 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 106 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق.
ەسكە سالساق، 2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.