ۇلتتىق ءبىرىڭعاي تەستىلەۋدەن از بالل جيناعان الماتىلىق ستۋدەنت نۇرداۋلەت بايحانوۆ كومانداسىمەن بىرگە «بولاشاق تۇلەكتەر قينالىپ قالماسا ەكەن» دەگەن نيەتپەن UNAI (يۋناي) ءموبيلدى قوسىمشاسىن جاساپ، ىسكە قوستى. قوسىمشا مەكتەپ بىتىرۋشىلەرگە ۇلتتىق ءبىرىڭعاي تەستىلەۋگە تەگىن دايىندالۋعا، قاتەمەن جۇمىس جاساۋعا، تالداۋ جۇرگىزىپ، توپپەن سىناق تاپسىرۋعا مۇمكىندىك بەرەدى، دەپ حابارلايدى اlmaty-akshamy.kz.
قازىرگى ۋاقىتتا ۇلتتىق ءبىرىڭعاي تەستىلەۋگە دايىندايتىن قوسىمشالار، ونلاين پلاتفورمالار كوپ. UNAI-دىڭ ەرەكشەلىگى – قوسىمشانى قولدانۋ تەگىن. سونىمەن قاتار تەك ۇبت-عا دايىندالىپ عانا قويماي، تۇلەكتەر ءوز ءبىلىم دەڭگەيىن ۇنەمى باقىلاپ وتىرا الادى.
نۇرداۋلەت بايحانوۆ، ستۋدەنت: - قاي ۋاقىتتان باستاپ ۇبت بار، سونىڭ ءبارىن قامتىدىق. نەگىزىنەن ءبىزدىڭ باعدارلامادا 2022-2023 جاڭا باعدارلامانىڭ سۇراقتارى. سەبەبى ءوزىم ۇبت تاپسىرعان كەزدە تەك قانا جاڭا سۇراقتار كەلگەن بولاتىن. جانە دە مەن سول سۇراقتاردى تابا الماي قينالعاندىقتان از بالل جيناعان بولاتىنمىن.
ءبىر جارىم اي بۇرىن ىسكە قوسىلعان ءموبيلدى قوسىمشاعا ءقازىردىڭ وزىندە ەكى مىڭعا جۋىق قولدانۋشى تىركەلگەن. ولاردىڭ ناتيجەسى دە جامان ەمەس. الدى 90 بالدىق كورسەتكىشتى ەڭسەرۋدە. ماقساتىمىز - بارىنشا تۇلەكتەردىڭ جوعارى بالل جيناپ، قالاعان ماماندىقتارى بويىنشا جوعارى وقۋ ورنىنا تۇسۋىنە ىقپال ەتۋ، دەيدى نۇرداۋلەت. ءموبيلدى قوسىمشا قازاق جانە ورىس تىلىندە جۇمىس ىستەيدى.
نۇرداۋلەت بايحانوۆ، ستۋدەنت: - پريلوجەنيە وتە وڭاي. جۇكتەگەننەن كەيىن، ويناۋ باتىرماسى تۇرادى. سول ارقىلى باسۋ ارقىلى، تولىقتاي ءوزىڭىزدىڭ دوسىڭىزبەن، سىنىپتاسىڭىزبەن نەمەسە جالعىز ءوزىڭىز تولىقتاي دايىندالساڭىز بولادى.
بۇل كوماندالىق جۇمىس. نۇرداۋلەت بايحانوۆتىڭ جوباداعى پوزيسياسى Co-founder، ياعني جوبا اۆتورى جانە ونى دامىتۋشى. ستارتاپ جوبا رەتىندە باستالعان قوسىمشانى قولدانىسقا ەنگىزۋگە ءبىر جارىم جىل ۋاقىت كەتىپتى.
كۇلجان توعجانوۆا، ۋنيۆەرسيتەتتىڭ كافەدرا مەڭگەرۋشىسى: - نۇرداۋلەت ءوزىن ءوزى دامىتۋعا جانە ءبىلىمىن جەتىلدىرۋگە دايىن. ءوزى ۇمتىلىسپەن بارلىق جۇمىستاردى اتقارىپ جۇرەدى. ستۋدەنتتەرگە بارلىعى قولجەتىمدى. وقيمىن دەسە، جۇمىس ىستەيمىن دەسە، زامان تالابىنا ساي قاجەتتى باعدارلامالاردى ازىرلەيمىن دەسە بارلىق مۇمكىندىك جاسالىنعان ستۋدەنتتەرگە.
نۇرداۋلەت بايحانوۆتىڭ كومانداسى ءقازىر سپورتپەن اينالىسۋشالارعا ارنالعان ءتيىمدى قوسىمشا جاساۋدى قولعا الىپتى. ال UNAI ءموبيلدى قوسىمشاسىن AppStore مەن PlayMarket-تەن جۇكتەپ الۋعا بولادى.