بۇگىنگە دەيىن موڭعولياداعى مال شىعىنى 1،5 ميلليوننان اسىپ ءتۇستى.
بۇقارالىق اقپارات قۇرالدارىنىڭ وكىلدەرىنە ارنالعان باسپا ءسوز ءماسليحاتىندا موڭعوليا پرەمەر-مينيسترىنىڭ ورىنباسارى، توتەنشە جاعدايلار جونىندەگى مەملەكەتتىك كوميسسياسىنىڭ جەتەكشىسى سايانبۋياعين امارسايحان وسىنداي دەرەك كەلتىرىلگەن مالىمدەمە جاسادى.
بۇل جايىندا islam.kz پورتالى forbes.kz اقپارات كوزىنە سىلتەمە جاساي وتىرىپ ءمالىم ەتەدى، دەپ حابارلايدى Almaty-akshamy.kz.
موڭعوليادا كليماتتىڭ وزگەرۋىنە بايلانىستى قىستا اق، تەمىر نەمەسە مۇز جانە قارا دەپ اۋىرلىعىنا بايلانىستى ساناتقا بولىنەتىن جۇت تۇرلەرىنەن وسى قىستىڭ باسىنان بەرى موڭعوليانىڭ باسىم بولىگىندە اتموسفەرالىق اۋا تەمپەراتۋراسىنىڭ كۇرت اۋىتقۋى مەن قالىڭ قاردىڭ سالدارىنان مال قىناداي قىرىلعان. اق جۇت قار قالىڭ جاۋعاندا كەلەدى، مالدىڭ قورەگى قار استىندا قالاتىندىقتان وسىلاي اتالعان. ال تەمىرجۇت نەمەسە مۇز جۇتى كوكتايعاق كەزىندە ورىن الادى – مال تەبىندەپ جايىلا المايدى، بۋاز بيەلەر ءىش تاستايتىن كەز. وسى ورايدا مال شارۋاشىلىعى موڭعوليا ەكونوميكاسىنىڭ نەگىزگى تىرەگى ەكەنىن ايتا كەتپەكپىز: كوشپەلى حالىقتىڭ 40%-ى وسى مالمەن كۇنكورىپ وتىر.