بعم ۇلتتىق تەستىلەۋ ورتالىعى ۇبت-عا دايىندالۋ ءۇشىن تەگىن سىناق تەستىلەۋىن ىسكە قوستى.
تەستىلەۋدى ورتالىقتىڭ سايتىنان سىلتەمەسى ارقىلى ونلاين رەجيمىندە وتۋگە بولادى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
ول ءۇشىن تەستىلەنۋشى الدىمەن جسن ەنگىزىپ، بەيىندىك پاندەر كومبيناسياسىن تاڭداپ، سىناققا قاتىسا الادى.
سىناق تەستىلەۋى تالاپكەرلەرگە تەستىلەۋگە دايىندىعىن جاقسارتۋعا جانە قانداي تاقىرىپتاردى تەرەڭىرەك زەردەلەۋ كەرەگىن تۇسىنۋگە كومەكتەسۋ ءۇشىن جاسالعان.
«مينيسترلىك تەك تەستىلەۋ كەزىندە عانا ەمەس، ونىڭ باستالۋىنا دەيىن دە قولايلى جاعداي جاساۋ ءۇشىن تۇراقتى جۇمىس جۇرگىزىپ كەلەدى. سوندىقتان تالاپكەرلەرگە ىڭعايلى بولۋ ماقساتىندا ءبىز ۇبت-عا دايىندالۋ ءۇشىن ونلاين سىناق تەستىلەۋدى ىسكە قوستىق. بۇل جۇيە بارلىق تالاپكەرگە تەگىن نەگىزدە قولجەتىمدى. سىناق تەستىلەۋىنەن ءوتۋ كەزىندە تالاپكەر تەست تاپسىرمالارىمەن تانىسۋعا جانە تاڭدالعان پاندەر بويىنشا ءوزىنىڭ ءبىلىم دەڭگەيىن تەكسەرۋگە مۇمكىندىگى بار. سونداي-اق بيىل ەرەكشە قاجەتتىلىكتەرى بار بالالارعا ارنايى جاعداي جاسالىپ وتىر. ولارعا ۇبت تاپسىرۋ كەزىندە قوسىمشا 40 مينۋت قوسىلدى. ودان بولەك، بيىل ەرەكشە ءبىلىم بەرۋدى قاجەت ەتەتىن بالالار ءۇشىن العاش رەت سۋرەتسىز، سىزباسىز جانە دياگرامماسىز تاپسىرمالار ازىرلەندى»، - دەپ ايتتى بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
بيىلعى ۇبت-نىڭ تاعى ءبىر جاڭالىعى جانە بالالاردىڭ ءوز ءبىلىمىن شىڭداۋىنا ۇلكەن مۇمكىندىك – ءار پانگە جەكە تاقىرىپتىق تالداۋ جۇرگىزۋ. سونداي-اق ۇتو ۇبت-عا دايىندىق بويىنشا تەگىن ونلاين ساباقتاردىڭ سانىن كوبەيتتى. سونىمەن قاتار بىلتىردان باستاپ تالاپكەرلەرگە كالكۋلياتور، مەندەلەيەۆ كەستەسىن جانە تۇزدىڭ ەرىگىشتىك كەستەسىن پايدالانۋعا رۇقسات ەتىلدى.
ونلاين سىناق تەستىلەۋى ۇلتتىق بىلىكتىلىك تەستىلەۋىن تاپسىراتىن پەداگوگتەر ءۇشىن دە قولجەتىمدى. سىناق تەستىلەۋ تەحنولوگياسى نەگىزگى تەستىلەۋگە سايكەس كەلەدى، ياعني پەداگوگتەر 2 بلوك بويىنشا تەست تاپسىرادى. ونىڭ كومەگىمەن مۇعالىمدەر وزدەرىنىڭ بىلىكتىلىك دەڭگەيلەرىن تەكسەرىپ، نەگىزگى بىلىكتىلىك سىناعىنا دايىندالا الادى. مۇعالىمدەر ۇتو سايتىندا prob-nqt.testcenter.kz سىلتەمەسى ارقىلى سىناقتان وتە الادى.