بۇل تۋرالى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ مالىمدەدى.
ناۋرىزدا ۇبت تەستىلەۋى كەزىندە ەرەجە بۇزعانى ءۇشىن اۋديتوريادان بارلىعى 259 ادام شىعارىلىپ، ولاردىڭ تەست ناتيجەسى جويىلدى. مۇنىمەن قاتار، ىشكى تەكسەرىس ناتيجەسىندە 9 تەست تاپسىرۋشىنىڭ ناتيجەسى جويىلىپ، ءۇش مامان قىزمەتىنەن بوساتىلدى، دەپ حابارلايدى Almaty-akshamy.kz Elorda.info-عا سىلتەمە جاساپ.
ورتالىق باسشىسىنىڭ ايتۋىنشا، WhatsApp ءنومىرىن اشىق جاريالاعالى بەرى حالىقپەن تىعىز بايلانىس ورناتقان. تەست تاپسىرۋشىلاردىڭ ءوزى ەرەجە بۇزۋ تۋرالى اقپاراتتى حابارلاپ وتىرادى.
"ەندى ءار قاتىسۋشىنىڭ ءوز تەست نۇسقاسى بولادى. ەگەر تەست تاپسىرۋشى تىيىم سالىنعان زاتپەن كىرۋگە تالپىنسا نەمەسە تەستىلەۋدە ۇستالسا، وندا ول ەكىنشى مۇمكىندىگىن قولدانا المايدى. ال ءدال وسىنداي جاعداي ەكىنشى مۇمكىندىگى كەزىندە قايتالانسا، وندا ءبىرىنشى مۇمكىندىگىنىڭ ناتيجەسى جويىلىپ، گرانت كونكۋرسىنا قاتىسا المايدى. ەكى مۇمكىندىكتى پايدالانۋدىڭ ءوز ەرەجەسى بار"، – دەدى رۋسلان ەمەلبايەۆ.
مۇنىمەن قاتار، ول ۇبت الدىندا تەست تاپسىرۋعا كومەكتەسەتىنىن ايتاتىن الاياقتار كوبەيگەنىن ەسكەرتتى. وسى ورايدا، ول تۇلەكتەردى تاۋەكەلگە بارماۋعا شاقىردى.
"شىنى كەرەك، تەستىلەۋدى وڭاي تاپسىرۋ ءۇشىن كەيبىر تەست تاپسىرۋشىلار ءارتۇرلى قۋلىققا بارۋعا دايىن. ءبىراق، ءبىزدىڭ جۇيەنى ەشكىم الداي المايدى. ناۋرىز ايىندا وتكەن ۇبت-دا تەستىلەۋ كەزىندە ەرەجەلەردى بۇزعانى ءۇشىن اۋديتوريادان بارلىعى 259 ادام شىعارىلىپ، ولاردىڭ ناتيجەسى جويىلدى. ونىڭ ىشىندە 9 تەستىلەنۋشى تەست سۇراقتارىن سۋرەتكە ءتۇسىرىپ، ولاردى telegram ارنالارعا تاراتقان. بۇل ماسەلەنى 2 اي بويى تولىعىمەن زەرتتەپ، قىزمەتتىك تەكسەرىس جۇرگىزدىك. سەبەبى سۇراق كوپ. مىسالى، تەست تاپسىرمالارى قالاي تارادى؟ كامەرالار نەگە ەشنارسە تۇسىرمەگەن؟ باقىلاۋشىلار قايدا قاراعان؟ ىشكى تەكسەرىستىڭ ناتيجەسىندە 9 تەست تاپسىرۋشىنىڭ ناتيجەسى جويىلىپ، 3 قىزمەتشى جۇمىستان بوساتىلدى. ءىس قۇزىرەتتى ورگاندارعا جىبەرىلدى"، – دەدى ورتالىق ديرەكتورى.