مەملەكەتتىك ءبىلىم بەرۋ گرانتتارىنىڭ يەگەرلەرى تۋرالى اقپارات بۇگىن تۇستەن كەيىن جاريالانادى. بۇل تۋرالى ق ر ءبىلىم جانە عىلىم مينيسترلىگى باسپا ءسوز قىزمەتىنەن ءمالىم بولدى، دەپ حابارلايدى Almaty-akshamy.kz.
«2021-2022 وقۋ جىلىنا ارنالعان مەملەكەتتىك گرانت يەگەرلەرىنىڭ ءتىزىمى بۇگىن ساعات 15.30-دا ق ر بعم Telegram- كانالىندا جاريالانادى»، - دەلىنگەن مينيسترلىك مالىمەتىندە.
سونىمەن قاتار، ساعات 16.00-دە: — «ەگەمەن قازاقستان» رەسپۋبليكالىق گازەتى جانە سايتى؛ «كازاحستانسكايا پراۆدا» رەسپۋبليكالىق گازەتى جانە سايتىندا جاريالانادى؛
بۇعان دەيىن ءبىلىم جانە عىلىم ءمينيسترى اسحات ايماعامبەتوۆ مەملەكەتتىك ءبىلىم بەرۋ گرانتتارى يەگەرلەرىنىڭ ءتىزىمى قاشان شىعاتىنىن ايتقان بولاتىن. «ءبىز دايىندالىپ جاتىرمىز. ءبىلىم بەرۋ گرانتتارىن تاعايىنداۋ جونىندەگى رەسپۋبليكالىق كوميسسيانىڭ ءبىرىنشى وتىرىسى ءوتتى. ورىنباسارىم قۋانىش ەرعالييەۆ وتكىزدى. ءقازىر كوميسسيا وتىرىسى ءوتىپ جاتىر. تامىزدىڭ 15-ىنە دەيىن بۇل جۇمىس اياقتالادى دەپ كۇتەمىز. سودان كەيىن ادەتتەگىدەي تاعايىنداۋ قورىتىندىسىن جاريا ەتەتىن بولامىز»، - دەدى مينيستر.