The Lancet جۋرنالىندا «QazVac» ۆاكسيناسى تۋرالى ماقالا جاريالاندى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ جەلىدە جازدى، دەپ حابارلايدى Almaty-akshamy.kz.
«EClinicalMedicine published by The Lancet جۋرنالى وتاندىق «QazVac» ۆاكسيناسىن كلينيكالىق زەرتتەۋدىڭ 1-2 فازاسىنىڭ ناتيجەلەرى تۋرالى ماقالانى قابىلداپ، ەلەكتروندىق نۇسقاسىن باسىپ شىعاردى. بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ عالىمدارىن ماقالانىڭ جاريالانۋىمەن قۇتتىقتايمىن!» - دەدى مينيستر اسحات ايماعامبەتوۆ.
ەسكە سالساق، 2020 جىلدىڭ ناۋرىز ايىندا ەلىمىزدە كوروناۆيرۋس ىندەتىنە بايلانىستى قاتاڭ كارانتيندىك شارالار قابىلداندى.مەملەكەت باسشىسى قاسىم-جومارت توقايەۆ ەلىمىزدىڭ بيولوگيالىق قاۋىپسىزدىك ماسەلەلەرى جونىندەگى عىلىمي-زەرتتەۋ ينستيتۋتىنىڭ عالىمدارى الدىنا ۆيرۋسقا قارسى ۆاكسينانى شۇعىل ازىرلەۋ تاپسىرماسىن جۇكتەدى. بۇگىندە وتاندىق عالىمدارىمىز قىسقا عانا ۋاقىتتىڭ ىشىندە دايىنداعان قازاقستاندىق «QazVac» ۆاكسيناسى ادامدارعا ەگىلىپ جاتقانى بەلگىلى.
QazVac ۆاكسيناسى - ق ر ءبىلىم جانە عىلىم مينيسترلىگىنىڭ بيولوگيالىق قاۋىپسىزدىك ماسەلەلەرى جونىندەگى عىلىمي-زەرتتەۋ ينستيتۋتى ازىرلەگەن COVID-19-عا قارسى بەلسەندىلىگى جويىلعان ۆاكسينا. يناكتيۆتەندىرىلگەن ۆاكسينا ءداستۇرلى جانە ءتيىمدى بولىپ سانالادى، ونى دايىنداۋ تەحنولوگياسى كۇردەلى ەمەس ءارى ۆاكسينالاردىڭ باسقا تۇرلەرىنە قاراعاندا ءقاۋىپسىز. سوندىقتان قازاقستاندىق عالىمدار يناكتيۆتەندىرىلگەن ۆاكسينا جاساۋ تۋرالى شەشىم قابىلدادى.
جاقىندا بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا QazVac ۆاكسيناسىنىڭ تيىمدىلىگى تۋرالى پىكىر ءبىلدىردى. مامان QazVac ۆاكسيناسىنا جاسالعان سىناقتىڭ III فازاسى ەكپەنىڭ تيىمدىلىگىن كورسەتكەنىن ايتتى.