تەستىلەۋ 5 شىلدەگە دەيىن جالعاسادى
نەگىزگى ۇبت-نى 40 مىڭ تالاپكەر تاپسىردى. تالاپكەرلەردىڭ 70%-ى قازاق تىلىندە، 30%-ى ورىس تىلىندە، 50 ادام اعىلشىن تىلىندە تەستىلەۋدەن ءوتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
ۇبت باستالعالى شەكتى بالدى 76%-عا جۋىق تالاپكەر جينادى. ورتاشا بالعا كەلەتىن بولساق، ول 68 بالدى قۇرادى. ەڭ جوعارى بالل – 137.
«نەگىزگى ۇبت-نىڭ ءبىرىنشى اپتاسى اياقتالدى. تەستىلەۋ 5 شىلدەگە دەيىن وتەدى. ەستەرىڭىزگە سالا كەتسەم، تەستىلەۋگە قاتىسۋعا ەكى مۇمكىندىكتى ەسەپكە العاندا 305 مىڭعا جۋىق ءوتىنىش كەلىپ ءتۇستى. قازىرگى تاڭدا تەستىلەنۋشىلەردىڭ باسىم بولىگى، اتاپ ايتقاندا، 20%-ى «ماتەماتيكا-فيزيكا» پاندەر كومبيناسياسىن تاپسىردى. 14%-ى «بيولوگيا-حيميا» كومبيناسياسىن تاڭداعان. ەڭ از تاڭدالاتىن كومبيناسيا – «حيميا-فيزيكا»، ونى 50 ادام تاپسىرعان»، - دەپ اتاپ ءوتتى عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ءبىرىنشى اپتادا 108 تالاپكەر قاتىسقانىن ايتا كەتكەن ءجون.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
بۇگىنگى تاڭدا 50 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 39 ادام شىعارىلىپ، ولاردىڭ ناتيجەلەرى جويىلدى. وزگە تۇلعالار انىقتالعان جوق.
ايتا كەتسەك، 2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.