قىزىلوردادا وتكەن ۇلتتىق قۇرىلتايدىڭ بەسىنشى وتىرىسى – ەل دامۋىنىڭ جاڭا كەزەڭىنە باستار تاعدىرلى ساتتەردىڭ ءبىرى بولدى. مەملەكەت باسشىسى قاسىم-جومارت توقايەۆتىڭ باستاماسىمەن قايتا جاڭعىرعان بۇل جالپىۇلتتىق ديالوگ الاڭى قىسقا ۋاقىت ىشىندە ەل تاعدىرىن ايقىندايتىن ستراتەگيالىق شەشىمدەر قابىلداناتىن، قوعام مەن مەملەكەتتىڭ شىنايى سۇحباتى ورنىققان ماڭىزدى ينستيتۋتقا اينالدى.
ەلدىك ءمانى بار ماسەلەلەردىڭ ءدال سىر بويىندا تالقىلانۋى – شاھارىمىزدىڭ تاريحتاعى، رۋحانياتتاعى جانە قازىرگى الەۋمەتتىك-ەكونوميكالىق دامۋىنداعى ەرەكشە ورنىنا بەرىلگەن جوعارى باعا. بۇل – وڭىرگە كورسەتىلگەن سەنىم عانا ەمەس، ەل بولاشاعىن بىرگە ايقىنداۋعا شاقىرعان جاۋاپكەرشىلىك.
مەملەكەت باسشىسىنىڭ 2025 جىلعى 30 قازانداعى جۇمىس ساپارى قىزىلوردانىڭ دامۋى ءسوز جۇزىندە ەمەس، ناقتى ىستەرمەن دالەلدەنىپ كەلە جاتقانىن كورسەتتى: ينفراقۇرىلىم جاڭارىپ، ءبىلىم مەن مادەنيەتكە سەرپىن بەرىلىپ، ادامي كاپيتالدى دامىتۋعا باعىتتالعان جۇيەلى ساياسات بەرىك جولعا قويىلدى.
ۇلتتىق قۇرىلتايدىڭ وتىرىسىندا كوتەرىلگەن ينستيتۋسيونالدىق رەفورمالاردى ەلدىڭ ساياسي مادەنيەتىن جاڭا ساپالىق دەڭگەيگە كوتەرۋگە باعىتتالعان ماڭىزدى ءارى ۋاقىت تالابىنا ساي قادامدار دەپ باعالايمىز. جاڭا پارلامەنتتىڭ وكىلەتتىكتەرىن ناقتىلاۋ، پرەزيدەنت اكىمشىلىگىن جاڭعىرتۋ، اپپاراتتىق قۇرىلىمداردى وڭتايلاندىرۋ جانە ۆيسە-پرەزيدەنت ينستيتۋتىن ەنگىزۋ جونىندەگى باستامالار بيلىك تارماقتارى اراسىنداعى جاۋاپكەرشىلىك پەن باسقارۋ تيىمدىلىگىن ارتتىرۋعا نەگىزدەلگەن سالماقتى شەشىمدەر ەكەنى انىق. بۇل باستامالار «كۇشتى ينستيتۋتتار – جاۋاپتى مەملەكەت» قاعيداتىنىڭ ناقتى ءىس جۇزىندەگى كورىنىسى بولىپ تابىلادى.
سونداي-اق قۇرىلتايدا كوتەرىلگەن سيفرلاندىرۋ مەن جاساندى ينتەللەكت ماسەلەلەرى ءبىلىم بەرۋ جۇيەسىنە تىكەلەي قاتىستى. قازىرگى ۋنيۆەرسيتەت تەك ءبىلىم تاراتۋشى ەمەس، تەحنولوگيالىق وزگەرىستەردىڭ قوزعاۋشى كۇشى بولۋى قاجەت. وسى تۇرعىدا مەملەكەت باسشىسىنىڭ سيفرلىق ترانسفورماسياعا بەلسەندى قاتىسۋ تۋرالى ۇستانىمى جوعارى ءبىلىم بەرۋ سالاسىنىڭ دامۋ باعىتىمەن تولىق ۇندەسەدى.
قوعامدىق كەلىسىمدى نىعايتۋ ماقساتىندا قازاقستاننىڭ حالىق كەڭەسىن قۇرۋ باستاماسى دا – ازاماتتىق قوعامنىڭ ءرولىن ارتتىرۋعا باعىتتالعان ماڭىزدى قادام. كەڭ وكىلدىلىككە نەگىزدەلگەن بۇل الاڭ حالىقتىڭ ءارتۇرلى توپتارىنىڭ پىكىرىن ەسكەرۋگە مۇمكىندىك بەرەدى دەپ سەنەمىن.
ۇلتتىق قۇرىلتاي ەل دامۋىنىڭ جاڭا ساپالىق كەزەڭىنە جول اشقان، ساياسي رەفورمالار، ادامي كاپيتال جانە ورنىقتى دامۋ ماسەلەلەرى توعىسقان ماڭىزدى ۇلتتىق الاڭ ەكەنىن تاعى ءبىر مارتە دالەلدەدى. مۇنداي فورماتتاعى اشىق ديالوگ قوعامنىڭ مەملەكەتكە دەگەن سەنىمىن ارتتىرىپ، بولاشاققا باعىتتالعان ورتاق جاۋاپكەرشىلىكتى كۇشەيتەدى.