ەلىمىزدە تابيعي ۋاقىت بەلدەۋى 8 رەت وزگەرگەن ەكەن
بەسىنشى ۋاقىت بەلدەۋى گەوگرافيالىق تۇرعىدان ەلىمىزدىڭ كوپ بولىگىن قامتيدى. ولجاس بەكتەنوۆ سيم مەن مام-عا نەعۇرلىم تۇسىنىكتى ءاقپاراتتىق-تۇسىندىرۋ ناۋقانىن جۇرگىزۋدى تاپسىردى، دەپ حابارلايدى aqshamnews.kz
Primeminister.kz cايتىنىڭ حابارلاۋىنشا، ۇكىمەت وتىرىسىندا ساۋدا جانە ينتەگراسيا ءمينيسترى ارمان شاققالييەۆ قازاقستاننىڭ 5ء-شى ۋاقىت بەلدەۋىنە كوشۋىنىڭ ارتىقشىلىقتارى تۋرالى باياندادى
مينيستر شەشىم قابىلداۋ كەزىندە پارلامەنت دەپۋتاتتارى، مەملەكەتتىك جانە جەرگىلىكتى ورگانداردىڭ وكىلدەرى، عالىمدار، ساراپشىلار، ينستيتۋتتار مەن قوعامدىق بىرلەستىكتەر كىرەتىن ۋاقىتتى ەسەپتەۋ ءتارتىبى بويىنشا ارنايى قۇرىلعان ۆەدومستۆوارالىق جۇمىس توبىنىڭ ەسەبىندە كورسەتىلگەن عىلىمي نەگىزدەلگەن دالەلدەر پايدالانىلعانىن اتاپ ءوتتى. تابيعي ۋاقىت جاقتاۋشىلارىنىڭ حالىقارالىق اليانسى (IANT) ۇكىمەتتىڭ قازاقستاننىڭ ورتالىق جانە شىعىس وبلىستارى ءۇشىن گەوگرافيالىق بويلىققا سايكەس كەلەتىن جانە حالىق ءۇشىن وڭتايلى شەشىم بولىپ تابىلاتىن UTC+5 ۋاقىت بەلدەۋىن بەلگىلەۋ تۋرالى شەشىمىنە وڭ قورىتىندى بەردى.
«قازاقستاندا ۋاقىت ەسەپتەۋ جۇيەسىنىڭ قالىپتاسۋ تاريحى الدىڭعى ۋاقىت بەلدەۋى UTC+6 العاش رەت 1930-1931 جىلدارى دەكرەتتىك، ياعني “بۇيرىقتىق” ۋاقىتتى ("ۋاقىت بەلدەۋى+ءبىر ساعات") قولدانۋ ارقىلى ەنگىزىلگەنىن كورسەتەدى. اۋماقتاردىڭ كوپ بولىگى ءىس جۇزىندە 5ء-شى ۋاقىت بەلدەۋىندە جاتقانىنا قاراماستان. جالپى، سوۆەتتىك كەزەڭدە قازاقستاندا كوماندالىق-جوسپارلى ەكونوميكا مۇددەسى ءۇشىن تابيعي ۋاقىت بەلدەۋى بۇيرىق تارتىبىمەن 8 رەت وزگەردى. ناتيجەسىندە قازاقستان تابيعي سيكلگە سايكەس كەلمەيتىن ۋاقىت بەلدەۋلەرىندە تۇردى. وسىلايشا، UTC+5 ءبىزدىڭ ەلىمىز ءۇشىن جاڭا بەلدەۋ ەمەس، تاريحي نەگىزدەلگەن ۋاقىتقا ورالۋ بولىپ سانالادى»، — دەپ اتاپ ءوتتى ارمان شاققالييەۆ.
UTC+5 ۋاقىت بەلدەۋى ەلىمىزدىڭ حالقىنىڭ 76%-دان استامى تۇراتىن (15 ملن 240 مىڭ ادام) استانا، الماتى، پەتروپاۆل، وسكەمەن، شىمكەنت، سەمەي جانە پاۆلودار قالالارىن قوسا العاندا، 67،5-تەن 82،5 گرادۋسقا دەيىنگى بويلىقتاردى قامتيدى. بۇگىنگى تاڭدا الەمنىڭ 195 ەلىنىڭ 117ء-سى گەوگرافيالىق ۋاقىتتى ستاندارتتى ۋاقىت بەلدەۋىنە مۇمكىندىگىنشە جاقىن ەتىپ تاڭدادى، ويتكەنى ادامنىڭ سيركادتى ىرعاعى تابيعي كۇندىزگى كەزەڭمەن سينحروندالادى. وسىلايشا، ۋاقىت بەلدەۋىن وزگەرتۋ تۋرالى قابىلدانعان شەشىم عىلىمي نەگىزدەلگەن جانە ەكونوميكالىق تۇرعىدان ورىندى سانالادى، دەدى مينيستر.
پرەمەر-مينيستر ساۋدا جانە ينتەگراسيا ءمينيسترى قولدانىستاعى ۋاقىت بەلدەۋىنىڭ پايداسىنا بارلىق جان-جاقتى دالەلدەر كەلتىرگەنىنە توقتالدى.
«ۇكىمەت بۇل شەشىمدى قولدايدى. ەلىمىزدىڭ اۋماعىنىڭ كوپ بولىگى 5ء-شى ۋاقىت بەلدەۋىندە ورنالاسقان، سوندىقتان عىلىمي تۇرعىدان بۇل دۇرىس شەشىم. ساۋدا جانە اقپارات مينيسترلىكتەرىنە نەعۇرلىم تۇسىنىكتى ءاقپاراتتىق-تۇسىندىرۋ ناۋقانىن جۇرگىزۋدى تاپسىرامىن»، — دەپ اتاپ ءوتتى ولجاس بەكتەنوۆ.