قازاقستاندىق ءبىلىم بەرۋ ۇيىمدارىندا تاماقتاندىرۋ ساپاسىنا كۇندەلىكتى مونيتورينگ جۇرگىزۋ ەنگىزىلدى
بۇل تۋرالى ق ر ۇكىمەتىنىڭ وتىرىسىندا بايانداما جاساعان وقۋ-اعارتۋ ءمينيسترى عاني بەيسەمبايەۆ مالىمدەدى، دەپ حابارلايدى aqshamnews.kz.
بۇل جونىندە وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
ءمينيستردىڭ ايتۋىنشا، بيىلعى جىلى ءتيىستى نورماتيۆتىك قۇقىقتىق تالاپتار كۇشەيتىلدى. اتاپ ايتقاندا، ءبىلىم بەرۋ ۇيىمدارىنداعى تاماقتاندىرۋ ستاندارتتارى دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارىنا سايكەس قايتا قارالدى.
«مەكتەپكە دەيىنگى جانە ورتا ءبىلىم بەرۋ ۇيىمدارىنداعى تاماقتاندىرۋ ساپاسىن ارتتىرۋ ماقساتىندا كۇندەلىكتى مونيتورينگ ەنگىزىلدى. مەكتەپ اسپازدارىنىڭ بىلىكتىلىگىنە، ولاردىڭ ءبىلىمى مەن ەڭبەك وتىلىنە قويىلاتىن تالاپتار كۇشەيتىلدى. ءونىم بەرۋشىلەردىڭ قىزمەتىن باستاماس بۇرىن سانيتاريالىق-ەپيدەميولوگيالىق قورىتىندىسى بولۋى تۋرالى شارت بەكىتىلدى. سونداي-اق اس بلوگىنا بەينەباقىلاۋ ورناتۋ مىندەتتەلدى»، - دەدى مينيستر.
سونىمەن قاتار عاني بەيسەمبايەۆ «الەۋمەتتىك ءاميان» جوباسى اياسىندا تەگىن تاماق الاتىن بالالاردى اۆتوماتتاندىرىلعان تۇردە ەسەپكە الۋ جۇمىستارى جۇرگىزىلۋدە ەكەنىن اتاپ ءوتتى.
دەنساۋلىق ساقتاۋ مينيسترلىگىمەن بىرلەسىپ ءبىلىم بەرۋ ۇيىمدارىندا تاماقتانۋدىڭ جاڭا ستاندارتى ازىرلەندى، ونى 2025 جىلدان باستاپ قولدانىسقا ەنگىزۋ جوسپارلانۋدا. ەستەرىڭىزگە سالا كەتەيىك، بۇدان بۇرىن ەكى ۆەدومستۆو باسشىسى مۇنداي شەشىمدى ءبىلىم بەرۋ ۇيىمدارىنداعى تاماقتاندىرۋ ساپاسىنا بىرلەسىپ باقىلاۋ جۇرگىزۋ بارىسىندا قابىلداعان بولاتىن.