قازاقستانداعى ىقپالدى Amanat پارتياسىنىڭ دەپۋتاتتارى جاقىندا الەۋمەتتىك جەلىلەردە بەينەروليك جاريالادى. وندا ولار مەملەكەت بويىنشا ءبىرىڭعاي ۋاقىت بەلدەۋىن ەنگىزۋدى قايتا قاراۋعا شاقىردى. بىرنەشە وڭىرگە بۇل وزگەرىستەر كەلەڭسىزدىك اكەلگەنىن ايتتى. كەلەسى ۇكىمەت ساعاتىندا بۇل سۇراقتى تالقىلاۋعا شىعارۋعا دايىن ەكەندىكتەرىن ءبىلدىردى. Taspanews.kz كوررەسپوندەنتى رينات زايىتوۆپەن حابارلاسىپ، شەشىم ولاردىڭ قاتىسۋىنسىز قابىلدانعانىن جانە ءماجىلىس دەپۋتاتتارىنا پىكىر بىلدىرۋگە مۇمكىندىك بەرىلمەگەنىن ءبىلدى.
«ىڭعايسىز ۋاقىت»
ۋاقىت بەلدەۋىن قايتا قاراۋعا باستاما كوتەرگەندەر قاتارىندا رينات زايىتوۆپەن بىرگە نۇرتاي سابيليانوۆ، ۇلىقبەك تۇماشينوۆ، ماقسات تولىقپايەۆ، سامات نۇرتازا جانە گۇلدارا نۇرىموۆا بار. ولار ءوز دەرەكتەرىندە ءبىرىڭعاي ۋاقىت بەلدەۋى تەك قوستاناي، قىزىلوردا، باتىس قازاقستان وبلىسى تۇرعىندارى ءۇشىن عانا قولايلى ەكەنىن ايتتى. الايدا، قاراما-قايشىلىقتار دا بارىن جەتكىزدى. ماسەلەن، سولتۇستىك قازاقستان، وڭتۇستىك قازاقستان، پاۆلودار، اباي وبلىستارى جانە جەتىسۋ وڭىرلەرىندە ايتارلىقتاي كەلەڭسىزدىكتەر تۋعان. بۇل وڭىرلەردە تاڭعى ساعات ءۇش جارىمدا كۇن شىعىپ، كەشكى ساعات بەستەردە باتىپ كەتەدى.
«ەكىنشى، ءۇشىنشى اۋىسىمدا وقيتىن وقۋشىلار نە ىستەمەك؟» — دەپ دەپۋتاتتار حالىقتىڭ ءسوزىن سويلەدى.
وسىلايشا، ۇكىمەت بۇل جاڭا ۇسىنىستى قاراۋعا ۋادە بەردى. ۆيسە-پرەمەر تامارا دۇيسەنوۆا شەشىم قابىلدانعاننان بەرى ءبىر جىل وتپەسە دە، دەپۋتاتتار كەلتىرەتىن دالەلدەر قاراستىرىلاتىنىن ايتتى.
ماجىلىستە تالقىلانباعان سۇراق
رينات زايىتوۆ Taspanews.kz تىلشىسىنە ۋاقىت بەلدەۋىن اۋىستىرۋ قازاقستاننىڭ كەي وبلىستارىندا ىڭعايسىزدىق تۋعىزعانىن ايتتى.
«سول وبلىستاردا تۇرىپ جاتقان حالىقتىڭ كۇندەلىكتى تىرشىلىگىنىڭ ىرعاعى بۇزىلىپ وتىر. وزگەرتپەسە بولمايدى ونى. ءبىراق، ادەتتەگى «ەستۋشى ۇكىمەتىمىز» تاعى ويلانۋ كەرەك دەپ جاتىر. بۇل كەشە عانا كوتەرىلگەن ماسەلە ەمەس. شەشىمىن تاپپاعان سوڭ، ءبىر توپ دەپۋتات — ءبىرى اباي وبلىسىنىڭ، ءبىرى شىعىس قازاقستان وبلىسىنىڭ وكىلدەرىمەن بىرىگىپ، باستاما كوتەردىك»، — دەدى ول.
ول بۇل ماسەلەدە سوڭعى ءسوز ۇكىمەت تاراپىنان ەكەنىن ايتتى.
«بۇل سولاردىڭ قاۋلىسى عوي. ونى پارلامەنت قابىلداعان جوق قوي، ۋاقىتتى اۋىستىرۋدى»، — دەدى ءماجىلىس دەپۋتاتى.
ول سوزىندە ماسەلەنى تالقىلاۋعا «ەرتەڭ بولسا دا دايىن» ەكەنىن ايتتى.
«تەك ۇكىمەتتىڭ جاۋابىن كۇتىپ وتىرمىز، تالقىلاۋ قاشان بولاتىنى تۋرالى. ءقازىر ارنايى فراكسيا بار، بىزدە كەلىسسوز جۇرگىزەتىن، ءماجىلىستىڭ اپپاراتى بار. سولار ۋاقىتىن بەلگىلەيدى. ارى كەتسە، وسى ايدىڭ ىشىندە تالقىلاۋ بولۋى كەرەك»، — دەدى رينات زايىتوۆ.
ول تالقىلاۋعا ارىپتەستەرىمەن بىرگە تياناقتى دايىندالعانىن ايتتى. ەكولوگتان باستاپ، ۋاقىت ماسەلەسى بويىنشا ماماندار مەن دارىگەرلەردەن دالەلدەر جيناعاندارىن، ولاردىڭ ۋاجدەرىن كەلتىرۋ عانا قالعانىن جەتكىزدى.
«ۇكىمەتتىڭ ءوزىنىڭ ءۋاجى بار. ءبىراق وندا ەشقانداي نەگىزدەمە جوق. ەكونوميكامىز وسەدى دەگەن، قايدا؟» — دەدى ول.
ول ەنگىزىلگەن وزگەرىستەر بۇرىنىراقتا ماجىلىستە تالقىلانباعاندىقتان، ءوز كەلىسپەۋشىلىگىن بىلدىرە الماعانىن ءتۇسىندىردى.