قىرعىزستان ازاماتىنا تىيىم سالىنعان ءدىني ادەبيەتتى تاسىمالداعانى ءۇشىن 258 مىڭ تەڭگە ايىپپۇل سالىندى.
تۇركسىب ستانسياسىنداعى جەلىلىك پوليسيا ءبولىمىنىڭ قىزمەتكەرلەرى رەيدتىك ءىس-شارالاردى وتكىزۋ بارىسىندا بىشكەك – سامارا باعىتىنداعى پويىز جولاۋشىلارىنىڭ بىرىنەن قازاقستان رەسپۋبليكاسىنىڭ اۋماعىندا تىيىم سالىنعان ءدىني ادەبيەتتەردى ساقتاۋ جانە تاسىمالداۋ فاكتىسىن انىقتادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
تەكسەرۋ كەزىندە قىرعىزستان رەسپۋبليكاسىنىڭ 19 جاستاعى ازاماتى انىقتالدى. ءدىنتانۋ ساراپتاماسى ءدىني ادەبيەتتىڭ قازاقستان رەسپۋبليكاسىنىڭ اۋماعىندا تىيىم سالىنعاندىعىن كورسەتتى. قۇقىق بۇزۋشىعا قاتىستى اكىمشىلىك ماتەريال تولتىرىلدى. جامبىل وبلىسى مەركى اۋداندىق سوتىنىڭ شەشىمىمەن شەتەل ازاماتى اكىمشىلىك جاۋاپكەرشىلىككە تارتىلىپ، وعان 70 ايلىق ەسەپتىك كورسەتكىش (258 440 تەڭگە) مولشەرىندە ايىپپۇل سالىندى.