الماتى قالاسىندا ىسكەرلىك ورتادا جىلسايىنعى باستى وقيعالاردىڭ ءبىرى – Women in Business حالىقارالىق فورۋمى ءوتتى.
ءبىر الاڭعا بيزنەس-قوعامداستىقتىڭ تابىستى، تانىمال سپيكەرلەرى مەن كاسىپكەرلەر جينالدى. قوناقتارعا ءتيىمدى نەتۆورك، ساپالى كونتەنت، بىرەگەي كەيستەر مەن ىسكەرلىك ورتاداعى ەڭ وزەكتى اقپارات ۇسىنىلدى، دەپ حابارلايدى Almaty-akshamy.kz.
الماتى قالاسىنىڭ ىسكەر ايەلدەر كەڭەسى، Halyk Bank جانە Masterسard ۇيىمداستىرعان فورۋم جۇمىسىنا 300-دەن اسا تابىستى ايەل كاسىپكەرلەر، قوعام قايراتكەرلەرى، دامۋ ينستيتۋتتارى، ءىرى كومپانيالار، بانكتەردىڭ باسشىلارى قاتىستى.
«بۇگىن ءبىر الاڭعا بيزنەستىڭ ءتۇرلى سالالارىنداعى تابىستى كاسىپكەر ايەلدەر جينالدى. فورۋم جىل سايىن وتەدى. ءبىز ىسكەر جانە جاڭادان كاسىبىن باستاعان ايەل كاسىپكەرلەر ءۇشىن مازمۇندى جانە پايدالى باعدارلامانى ۇسىندىق. ءار سەسسيا – بەلگىلى ءبىر تاقىرىپتىڭ جەكە بلوگى، وندا ساراپشىلار پىكىر ءبولىسىپ، تابىستى كاسىپكەرلەر تاجىريبەسى تۋرالى ايتادى. جىلدان جىلعا فورۋمنىڭ اياسى كەڭەيىپ، وعان جاقىن جانە الىس شەتەلدەن قوناقتار، سپيكەرلەر قاتىسىپ جاتىر»، – دەپ اتاپ ءوتتى فورۋمدى ۇيىمداستىرۋشى، الماتى قالاسىنىڭ ىسكەر ايەلدەر كەڭەسىنىڭ ءتورايىمى اقەركىن ەرالييەۆا.
قحر باس كونسۋلى سزيان ۆەي ايەلدەردىڭ قۇقىعى مەن مۇمكىندىكتەرىن كەڭەيتۋ – جاھاندىق تۇراقتى دامۋ ماقساتىنداعى ماڭىزدى ماسەلە ەكەنىن اتاپ ءوتتى.
«بۇل فورۋمدى قازىرگى كۇردەلى جاھاندىق احۋال اياسىندا وتكىزۋ، ايەلدەردىڭ مۇمكىندىكتەرىن كەڭەيتۋ سياقتى تاقىرىپتار بويىنشا پىكىر الماسۋ جانە تالقىلاۋ ماڭىزدى پراكتيكالىق مانگە يە جانە ۋاقىتتىڭ ايرىقشا ەرەكشەلىكتەرىن كورسەتەدى»، – دەدى سزيان ۆەي ءوز سوزىندە.
«دامۋ» قورىنىڭ باسقارما ءتورايىمى گاۋھار بورىبايەۆا ايەلدەر كاسىپكەرلىگىن مەملەكەتتىك قولداۋ تۋرالى ايتتى.
«ۇكىمەت قازاقستانداعى شاعىن جانە ورتا كاسىپكەرلىكتى دامىتۋعا ۇلكەن كوڭىل بولەدى. سونىڭ ىشىندە ايەلدەر كاسىپكەرلىگىن دامىتۋ بار. ايەل كاسىپكەرلەردىڭ جوبالارى «دامۋ» قورى قولداعان جوبالاردىڭ جالپى سانىنىڭ 47%-ىن قۇرايدى. قور قىزمەتىنىڭ بارلىق كەزەڭىندە ايەلدەر كاسىپكەرلىگىندە 2 893 ملرد تەڭگە سوماسىنا 96 مىڭ جوبا قولداۋ تاپتى. قازىرگى كەزدە كاسىپكەر ايەلدەر ءوز بيزنەس-يدەيالارىن ىسكە اسىرۋ، كومپانيالاردى دامىتۋ جانە جاڭا جۇمىس ورىندارىن قۇرۋ ءۇشىن مەملەكەتتىك قولداۋدى ءتيىمدى پايدالاناتىنى قۋانتادى»، – دەپ اتاپ ءوتتى «دامۋ» قورىنىڭ باسقارما ءتورايىمى گاۋھار بورىبايەۆا.
«دامۋ» قورىنىڭ مالىمەتىنشە، كاسىپكەر ايەلدەر كوبىنە قىزمەت كورسەتۋ، اۋىل شارۋاشىلىعى جانە وڭدەۋ ونەركاسىبى سالاسىندا جۇمىس ىستەيدى.
اقش-تىڭ باس كونسۋلى ميشەل ەركىن ايەلدەردىڭ قوعام، ەكونوميكانىڭ وركەندەۋىندەگى ءرولىن اتاپ ءوتتى.
«ايەلدەردىڭ ەكونوميكالىق مۇمكىندىكتەرىن كەڭەيتۋ – جالپى وركەندەۋدى قامتاماسىز ەتۋدىڭ كىلتى. سوندىقتان ءبىز ايەلدەر ءۇشىن لايىقتى اقى تولەنەتىن، ساپالى جۇمىس ورىندارىن قۇرۋ ارقىلى ەكونوميكالىق باسەكەگە قابىلەتتىلىكتى ارتتىرۋ ماقساتىندا قازاقستانمەن ىنتىماقتاسۋعا نيەتتىمىز»، – دەدى اقش-تىڭ باس كونسۋلى ميشەل ەركىن.
Dasco Consulting Group باسقارۋشى ديرەكتورى دارمەن ءسادۋاقاسوۆ ساۋدا سالاسىنداعى ايەلدەردىڭ ءرولى تۋرالى ايتتى. Dasco Consulting Group مالىمەتتەرى بويىنشا، ەلدەگى ءاربىر بەسىنشى جۇمىس ىستەيتىن ايەل ساۋدا سالاسىندا قىزمەت ەتەدى. ساۋداداعى ايەلدەردىڭ 15%-دان استامى الماتى قالاسىنا تيەسىلى.
«الماتى قالاسى ساۋدامەن اينالىساتىن ايەلدەر سانى بويىنشا كوش باستاپ تۇر. ءبىراق ولاردىڭ ۇلەسى نەبارى 52%-دى قۇرايدى. ۇلىتاۋ جانە قوستاناي وبلىستارىندا ساۋدا سەكتورىندا جۇمىسپەن قامتىلعانداردىڭ 67%-ىى ايەلدەرگە تيەسىلى. ساۋداداعى ايەلدەردىڭ ەڭ از ۇلەسى تۇركىستان وبلىسىندا قالاسىندا، وندا كورسەتكىش 47%-دى قۇرادى»، – دەيدى دارمەن ءسادۋاقاسوۆ.
سپيكەر جالپى ەكونوميكاعا قاراعاندا ساۋدا سەكتورىندا جوعارى ءبىلىمى بار ايەلدەردىڭ ۇلەسى الدەقايدا جوعارى ەكەنىن اتاپ ءوتتى.
«جوعارى جانە جوعارى وقۋ ورنىنان كەيىنگى ءبىلىمى بار جۇمىسپەن قامتىلعان ايەلدەردىڭ ۇلەسى ەكونوميكادا 38%-دى، ال ساۋدا سەكتورىندا 49%-دى قۇرايدى. كەرىسىنشە، ساۋدادا تەحنيكالىق جانە كاسىپتىك ءبىلىمى بار جۇمىسپەن قامتىلعان ايەلدەردىڭ ۇلەسى 45%، ال قازاقستاندا جالپى – 56%-دى قۇرايدى»، – دەپ تولىقتىردى سپيكەر.
فورۋمدا الەۋمەتتىك كاسىپكەرلىك جانە قايىرىمدىلىق تاقىرىبىنا جەكە سەسسيا ارنالدى. الماتى قالاسى ىسكەر ايەلدەر كەڭەسىنىڭ ءتورايىمى اقەركىن ەرالييەۆا الەۋمەتتىك كاسىپكەرلىكتى ءوز بيزنەسىن دامىتۋعا جانە قالالار مەن اۋىلداردىڭ دامۋىنا ەلەۋلى ۇلەس قوسۋعا ۇمتىلاتىن ادامدار قالىپتاستىراتىنىن ايتتى.
مىسالى، Halyk قورى قازاقستاندا ءومىر ءسۇرۋ ساپاسىن جاقسارتۋ جانە دامىتۋ ءۇشىن قولايلى ورتانى قامتاماسىز ەتۋمەن اينالىسادى. قور جىل سايىن وڭىرلەردەگى الەۋمەتتىك جوبالارعا ميللياردتاعان تەڭگە بولەدى. Aل Ayala قورى 2010 جىلدان باستاپ ەلدەگى بالالار ءولىمىنىڭ كورسەتكىشىن ەكى ەسەگە تومەندەتۋگە كومەكتەستى جانە وسىلايشا بۇۇ-نىڭ تۇراقتى دامۋىنىڭ 17 ماقساتىنىڭ بىرىنە («دەنساۋلىق پەن ءال-اۋقات») قول جەتكىزۋ پروسەسىنە قاتىستى.
«قازاقستاندا قايىرىمدىلىقپەن اينالىساتىن 23 مىڭنان استام ۇكىمەتتىك ەمەس ۇيىم تىركەلگەن. Halyk قورى رەتىندە ءبىز باسقا قورلارمەن بىرلەسىپ، وسى ماڭىزدى سالاداعى ۇلەس پەن تيىمدىلىكتى كۇشەيتۋ ءۇشىن ۇسىنىستار بەرۋگە دايىنبىز. سودان كەيىن وسى ۇسىنىستاردى ودان ءارى جەتىلدىرۋ ماقساتىندا ۋاكىلەتتى مەملەكەتتىك ورگانعا جولدايمىز»، – دەدى Halyk قورىنىڭ ديرەكتورى ناريمان ءابىلشايىقوۆ.
«ايەلدەردىڭ ليدەرلىك جاسامپاز ءپرينسيپى كوپتەگەن جىل بويى قازاقستاننىڭ ەكونوميكاسى مەن قوعامىنىڭ ءتۇرلى اسپەكتىلەرىن بەلسەندى تۇردە وزگەرتىپ كەلەدى. ءىرى قازاقستاندىق قايىرىمدىلىق ۇيىمدارىن ايەلدەر باسقارىپ وتىر. ولار ءوز بيزنەسىن قاتار دامىتىپ، مەملەكەتكە وزەكتى الەۋمەتتىك ماسەلەلەردى شەشۋگە كومەكتەسىپ ءجۇر»، – دەپ اتاپ ءوتتى Ayala قايىرىمدىلىق قورىنىڭ نەگىزىن قالاۋشى جانە پرەزيدەنتى ايدانا سۇلەيمەنوۆا.
فورۋمنىڭ نەگىزگى تاقىرىپتارى: ايەلدەردىڭ قۇقىعى مەن مۇمكىندىكتەرىن كەڭەيتۋدەگى حالىقارالىق ترەندتەر، ەكونوميكا جانە قارجى ماسەلەلەرى، الەۋمەتتىك جاۋاپكەرشىلىك، ايەلدەر كاسىپكەرلىگىن قولداۋ شارالارى.
Women in Business– كاسىپكەر ايەلدەرگە ارنالعان ديالوگ الاڭى. وندا بيزنەس-ورتا، سونىڭ ىشىندە ايەلدەر كاسىپكەرلىگى، ەكونوميكالىق ساياسات، سالالىق مامانداندىرۋدى دامىتۋدىڭ اناعۇرلىم تۇيتكىلدى تاقىرىپتارى تالقىلاناتىن بولادى.
فورۋم جۇمىسىنا «Halyk Bank» اق باسقارما ءتورايىمى ءۇمىت شاياحمەتوۆا، قازاقستانداعى بۇۇ تۇراقتى ۇيلەستىرۋشىسى ميكاەلا فريبەرگ-ستوري، اقش باس كونسۋلى ميشەل ەركىن، قحر باس كونسۋلى سزيان ۆەي، IFC قازاقستان وكىلدىگىنىڭ باسشىسى ەكاتەرينا بەندجامين، «دامۋ» كاسىپكەرلىكتى دامىتۋ قورىنىڭ باسقارما ءتورايىمى گاۋھار بورىبايەۆا، ەۋرازيا ايماعىندا Strategy سەرىكتەسى PwC كونسۋلتاسيالىق پراكتيكاسىنىڭ كوشباسشىسى ناتاليا ليم، قازاقستاندىق باسپا ءسوز كلۋبىنىڭ پرەزيدەنتى اسەل قاراۋىلوۆا جانە باسقا سپيكەرلەر قاتىستى.
فورۋم اياسىندا قاتىسۋشىلار ەلىمىزدىڭ تابىستى ايەلدەر جانە كاسىپكەرلەرىمەن قارىم-قاتىناس جاساۋ، تاجىريبە الماسى مۇمكىندىگىنە يە بولدى.