پرەزيدەنتتىككە ۇمىتكەر نۇرلان اۋەسبايەۆ تىعىز سالىنعان قۇرىلىسقا قارسى پىكىر ءبىلدىردى.
ول بۇل ماسەلە تەك ەلوردا جانە الماتى قالاسىمەن شەكتەلمەيتىندىگىن اتاپ ءوتتى. بۇگىنگى كۇنى بۇل قازاقستاننىڭ بارلىق دەرلىك قالالارىنا تانىس جاعداي. نۇرلان اۋەسبايەۆتىڭ پىكىرىنشە، تىعىز قۇرىلىس قالا قاسىرەتىنە اينالۋدا. ودان بولەك تويىمسىز قۇرىلىس سالۋشىلارعا ەڭ جاقسى جەر تەلىمدەرىنىڭ بەرىلەتىنى تاعى بار. وعان قوسا اكىمدىكتەر يگەرۋگە باس جوسپار بويىنشا مەكتەپ، بالاباقشا مەن اۋرۋحانالار سالىنۋى ءتيىس جەرلەردى بەرۋدە. ناتيجەسىندە تۇرعىندار الەۋمەتتىك ينفراقۇرىلىمنىڭ جوقتىعىنان زارداپ شەگەدى.
نۇرلان اۋەسبايەۆ قوعام الدىندا تۇرعان تاعى ءبىر ماسەلە – سىبايلاس جەمقورلىق. قۇرىلىس سالۋشىلار ءوز مۇددەلەرىن عانا ويلاپ، پارا بەرۋ ارقىلى ەڭ جاقسى جەر تەلىمدەرىن يەلەنۋگە ۇمتىلادى دەپ ەسەپتەيدى.
ۇمىتكەردىڭ پىكىرىنشە، جاعدايدى بارلىق دەڭگەيدەگى اكىمدەردى تىكەلەي سايلاۋدى ەنگىزۋ ارقىلى عانا وزگەرتۋگە بولادى.
– قالا باسشىلارى حالىق الدىنداعى جاۋاپكەرشىلىكتەرىن سەزىنبەيىنشە، پاراقورلىقتى جەڭۋ مۇمكىن ەمەس، – دەيدى ول.
وسى ۋاقىتتا الماتىدا بەلسەندىلەر «سالاۋاتتى ءومىر سالتى مەن تابيعاتتىڭ ساقتالۋى ءۇشىن!» نۇرلان اۋەسبايەۆتى قولداپ، تازا اۋادا جاتتىعۋلار ۇيىمداستىردى.
قازاقستان پرەزيدەنتىنىڭ كەزەكتەن تىس سايلاۋى 20 قاراشادا وتەدى. ەگەر باسقا وڭىردە تىركەلگەن ادام 20 قاراشادا الماتىدا بولسا جانە وسىندا داۋىس بەرگىسى كەلسە، وندا ول زاڭعا سايكەس ءوزىنىڭ تىركەلگەن جەرى بويىنشا سىرتتاي كۋالىكتى الىپ، سايلاۋ كۇنى وسى قۇجاتپەن كەز كەلگەن سايلاۋ ۋچاسكەسىنە كەلۋگە ءتيىس ەكەنىن ءبىلۋ ماڭىزدى. سونداي-اق ەسەپتەن شىعارۋ كۋالىگى باسقا سايلاۋ وكرۋگىندە نەمەسە ءبىر ەلدىمەكەن شەگىندە باسقا سايلاۋ ۋچاسكەدە داۋىس بەرۋگە قاتىسقىسى كەلەتىن سايلاۋشىلارعا بەرىلمەيدى. ياعني، الماتىلىقتار وزدەرى بەكىتىلگەن ۋچاسكەلەردە عانا داۋىس بەرۋى ءتيىس.