پرەزيدەنتتىككە كانديدات سالتانات تۇرسىنبەكوۆا الماتىداعى «رودنيك» ايەلدەر مەن بالالارعا ارنالعان الەۋمەتتىك-پسيحولوگيالىق وڭالتۋ جانە بەيىمدەۋ ورتالىعىنا باردى.
كانديدات مۇنداي ورتالىقتاردىڭ ماڭىزدىلىعىنا توقتالا كەلە، قوعامدىق ۇيىمدار جۇمىسىنىڭ كۇردەلىلىگىن اتاپ ءوتتى، دەپ حابارلايدى «Almaty aqshamy».kz پرەزيدەنتتىككە كانديدات شتابىنىڭ باسپا ءسوز قىزمەتىنە سىلتەمە جاساي وتىرىپ.
ورتالىق باسشىسى نينا بالابايەۆا ورتالىقتىڭ قانداي ماڭىزدى ماسەلەلەردى شەشەتىنىن ايتا كەلىپ، ولاردىڭ قاتارىنا زاڭسىز ەڭبەك قاناۋى، ادام ساۋداسى، اجىراسقاننان كەيىن ايەلدەرگە كومەكتەسۋ سەكىلدى ماسەلەلەر بار ەكەنىن جەتكىزدى.
سالتانات تۇرسىنبەكوۆا قۇقىق قورعاۋشىلارمەن، ۇەۇ وكىلدەرىمەن جانە قالانىڭ قوعامدىق پىكىر كوشباسشىلارىمەن دە كەزدەسۋ وتكىزدى. كەزدەسۋگە قاتىسۋشىلار جەڭىلدەتىلگەن يپوتەكا، الەۋمەتتىك تۇرعىن ءۇي، بالالاردىڭ قۇقىقتارىن قورعاۋ، كەدەيلىك جانە تابىس تەڭسىزدىگى ماسەلەلەرىن جانە باسقا دا كوپتەگەن وزەكتى تاقىرىپتاردى كوتەردى.
-شەتەلدە ءاربىر رەفورما ونى ۇسىنعان جانە جۇزەگە اسىراتىن شەنەۋنىكتىڭ ەسىمىمەن اتالادى. بىزدە دە سولاي بولۋى كەرەك. سوندا تۇرمىستىق زورلىق-زومبىلىق، سۋيسيد، ەسىرتكى قىلمىسىنا توسقاۋىل ءۇشىن – ءاربىر جەكە شەنەۋنىكتىڭ جەكە جاۋاپكەرشىلىگى بولادى. ناتيجەلەردىڭ جوقتىعى ءۇشىن دە جاۋاپكەرشىلىك بولادى. رەفورمالاردى ۇسىنۋ جانە مەحانيزمدى ازىرلەۋ جەتكىلىكسىز، ستاتۋس-كۆونى وزگەرتۋگە قول جەتكىزۋ كەرەك. سەبەبى، ءار ءتۇرلى باعدارلامالارعا ءاردايىم ۇلكەن قاراجات بولىنەدى جانە ولاردىڭ قانشالىقتى ءتيىمدى ءارى سول ماقساتتارعا جۇمسالعانى ۇنەمى انىق بولا بەرمەيدى، - دەيدى س.تۇرسىنبەكوۆا.
پرەزيدەنتتىككە ۇمىتكەر س.تۇرسىنبەكوۆا بۇعان دەيىن ەلوردادا، قاراعاندى، اقمولا، تۇركىستان وبلىستارى مەن شىمكەنت قالاسىندا بولدى.
قازاقستان پرەزيدەنتىنىڭ كەزەكتەن تىس سايلاۋى 20 قاراشادا وتەدى.