العاشقى قوڭىراۋ مەرەكەسى سىنىپ ساعاتى رەتىندە اتالىپ ءوتتى.
الماتى قالالىق قىلمىستىق اتقارۋ جۇيەسى دەپارتامەنتىنە قاراستى لا-155/6 تۇزەۋ كولونياسىندا دا ءبىلىم كۇنى اتالىپ ءوتتى، دەپ حابارلايدى Almaty-akshamy.kz.
اياعىن شالىس باسىپ، جازالى بولىپ، سوتتلاعان بالالار تاربيەلەنىپ جاتقان مەكەمەدە جاڭا وقۋ جىلىنىڭ باستالۋىنا وراي ۇيىمداستىرىلعان العاشقى قوڭىراۋ مەرەكەسى سىنىپ ساعاتى رەتىندە اتالىپ ءوتتى.
مەكەمەدەگى سوتتالعاندار اراسىندا الەۋمەتتىك-پسيحولوگيالىق تاربيە جۇمىسى ءبولىمىنىڭ باستىعى، ادىلەت مايورى الما بازىلبايەۆا ۇستازدار مەن وقۋشىلاردى ءبىلىم كۇنىمەن قۇتتىقتادى. مەكتەپ مۇعالىمدەرىنىڭ قاجىرلى ەڭبەگىنە العىس ايتا وتىرىپ، ساتتىلىك، تابىستار تىلەدى.
بيىل بالالار تۇرمەسىندەگى ءبىلىم وشاعىندا 4 سىنىپ جاساقتالعان. 10-11-سىنىپتاردا بارلىعى 33 وقۋشى ءبىلىم الادى. ولارعا 11 ءمۇعالىم ساباق بەرەتىن بولادى. جاستاردىڭ قاۋىپسىزدىگى ءۇشىن ۇستازدار تۇگەل دەرلىك ەكپە العان.
بۇگىنگى ايتۋلى كۇندە ءار سىنىپتىڭ جەتەكشىلەرى «تاۋەلسىزدىك جەتىستىكتەرى» دەگەن تاقىرىپتا سىنىپ ساعاتىن ءوتتى. قازاقستاننىڭ 30 جىل ىشىندە جەتكەن جەتىستىكتەرى سارالانىپ، جاسوسپىرىمدەرگە ءتۇسىندىرىلدى.