«الىپپەمەن» دوستاسقان بۇلدىرشىندەر مەكتەپكە كەلدى

ەلىمىزدىڭ بارلىق مەكتەپتەرىندە العاشقى قوڭىراۋ سوعىلدى.

ءبىلىم كۇنى ءبىلىم جانە عىلىم مينيسترلىگىنىڭ قابىلداعان شەشىمىنە سايكەس، مەكتەپ تابالدىرىعىن العاش اتتاعان بالالارعا مەرەكەلىك جيىن وتكىزىلدى، دەپ حابارلايدى Almaty-akshamy.kz.

 الماتى قالاسىنداعى اقيىق اقىن مۇقاعالي ماقاتايەۆ اتىنداعى №140 گيمنازيادا «العاشقى قوڭىراۋ» ءراسىمى 4 مەزگىلگە ءبولىنىپ وتكىزىلدى. سەبەبى 1 سىنىپقا قابىلدانعان 300-گە جۋىق شاكىرتتى ءبىر ۋاقىتتا مەكتەپ اۋلاسىنا جيناۋدىڭ ءوزى كارانتين تالاپتارىنا قايشى كەلەتىندىگى ايتپاسا دا تۇسىنىكتى.

ادەتتەگىدەي ءانۇران ورىندالىپ، ءىس-شاراعا قاتىسۋشىلاردى گيمنازيا ديرەكتورى تىلەۋباي ءسانيا وسكەنباي قىزى ءبىلىم كۇنىمەن قۇتتىقتاپ، مەكتەپ تابالدىرىعىن اتتاعان ورەندەرىنە ونەر، ءبىلىم، عىلىم جولىندا مۇقالمايتىن كۇش-قايرات تىلەدى، "ورلەۋ" باۇو" اق فيليالى الماتى قالاسى بويىنشا پق باي وكىلى اسىلبەك پەرۋزا وزەنبەك قىزى ءسوز كەزەگىندە مەكتەپ تابالدىرىعان تارىداي بولىپ اتتاعان بۇلدىرشىندەردىڭ ەلىن، جەرىن، ءداستۇرىن قۇرمەتتەيتىن، ساۋاتتى، ءبىلىمدى ۇرپاق بولىپ قالىپتاسۋىنا دەگەن ىزگى تىلەگىن ءبىلدىردى.

ءبىلىم ورداسىن العاش اتتاعان ءبۇلدىرشىن قولىنداعى گۇل شوقتارى، ۇكىلى ءۇمىتىن جەتەلەگەن اتا-انا، قۇشاعى گۇلگە تولعان ۇستازدار مەكتەپ اۋلاسىن ەرەكشە قۋانىشقا بولەيدى. العاشقى قوڭىرۋ سوعىلعان سوڭ، 1 سىنىپ وقۋشىلارىنا العاشقى وقۋلىعى – «الىپپە» ۇلەستىرىلدى. ءار شاكىرتتىڭ جۇرەگىندە ماڭگى ساقتالاتىن العاشقى ۇستازدارى سىنىپقا قاراي جول باستادى. تاۋەلسىز ەلىمىزدىڭ تىزگىنىن ۇستايتىن بۇلدىرشىندەر «الىپپەسىن» قۇشاقتاپ، ءبىلىم ايدىنىنىڭ اق كەمەسىنە ءمىنىپ بارادى.