اپامنىڭ كۇيەۋى سەيدان جەزدەمدى ءبارى «ناچالنيك» دەپ كەتكەن. ءوزى قارا، قۋاڭ ءوڭدى بولاتىن. كىشىلەر سەيدان اتا دەيتىنبىز. شىلىمدى كوپ شەگەتىن. باسىنا ۇنەمى بورىك كيىپ جۇرەتىن. مىلتىق اتقاندا دالدىكپەن تيگىزەتىن. قالجىڭدى تىستەپ-تارتىپ ايتاتىن. ايتقاندا ءون بويىڭدى شىمىرلاتاتىن. ار جاعىن باعامداي بەرىڭىز. ءىسى نىق، ارەكەتى ەسەپپەن بولاتىن. ارتىق قيمىلعا بارا بەرمەيتىن. ءبىر كورگەنگە قۋ ادام سياقتى سەزىلەتىن.
ول تۇزاق، قاقپان قۇرۋدىڭ شەبەرى ەدى. ءبىر كۇنى ەرتە تۇردىم. كوزىمدى اشا سالا، اپام مەن جەزدەم ۇيىنە جونەلدىم. سونداعى ەكى ءۇيدىڭ قاشىقتىعى 20-30 مەرتدەي. بارسام، توردا قاسقىردىڭ قوس بولتىرىگى جاتىر. تۇستەرى سۇر، يتكە ۇقسايدى. ىرىلدايدى. جولاتپايدى. كوپ ۇزاماي تەرىلەرىن سىپىردى. جانىڭ اشيدى. ءتىرى كەزدەرىندە ىرىلداپ، ايبات شەكسە دە، كوز جانارلارىنان نامىس پەن قايرات سەزىلدى. ايىبى قاقپانعا تۇسكەندىگى. كوپ ۇزاماي توعايداعى قۇلىندى بيەگە قاسقىر شاپتى. سانى بەلگىسىز. قۇلىننىڭ قۇيرىعىن وسىپ ءتۇسىپتى. ءبىرازعا دەيىن كەشقۇرىم مال قورا جاقتان قاسقىردىڭ ۇلىعان ءۇنى ەستىلىپ ءجۇردى. وسى ءۇن اي جارىقتا جاڭعىرىپ بەرەدى دەيسىز...
ەرتەسىنە جەزدەمدەر ارلاننىڭ ءىزى جاتقانىن ايتتى. الگى قۇلىن ارام قاتتى. بيەنى باۋىزداپ ۇلگەردى. ال كوكجالدار بولسا، بىرەسە قوراداعى، بىرەسە تۇزدەگى مالدارعا شابۋىلدارىن سايابىرلاتپادى. جەزدەم دە ۇزاق جىلدار سۇيىكتى ىسىنەن باس تارتپادى. ءسويتىپ، قارتايىپ، ءبىر ۇيدە جالعىز قالىپ، ومىردەن ءوتتى. تۇزاقشىنىڭ تاعدىرى وسىلاي بولدى.
وسى كۇنى "سول ەكى بولتىرىككە بەكەر ءتيدى مە؟" دەپ ويلايمىن. ەكى بولتىرىكتىڭ ءومىر سۇرۋگە دەگەن قۋاتتى جانارى كوز الدىمدا ماڭگى ساقتالىپ قالدى. سول شابۋىلداعان قاسقىرلاردىڭ كۇشىكتەرى ەكەن. ونى كەيىن بىلدىك. كىم ءبىلسىن؟! بالكىم، بولتىرىكتەردى قويا بەرگەندە، ءبارى باسقاشا بولار ما ەدى؟..