قازاق - رۋحتى حالىق. باتىرلار مەن دانالاردىڭ ۇرپاعى. جاۋگەرشىلىك كەزەڭدە نايزانىڭ ۇشىمەن، بىلەكتىڭ كۇشىمەن ەلدى قورعادى. باھادۇرلىك قاسيەت قانمەن سىڭەدى. بۇل – انىقتالعان اكسيوما.
بۇگىنگى زامان - باسەكەستىكتىڭ قىزعان شاعى. ول بارلىق سالادا ەتەك العان. ال سپورتتا جەتىستىكتەرىمىز از ەمەس. ونىڭ ىشىندە ەرەجەسىز جەكپە-جەكتەن كوك بايراعىمىزدى بارشاعا تانىتىپ، ۇلتتىق قۇندىلىقتارىمىزدى ناسيحاتتاپ جۇرگەن رۋحتى، جۇرەكتى، بىلەكتى، يماندى جىگىتتەرىمىز جەتەرلىك. بۇگىنگى كەيىپكەرىمىز - تالاي دودالاردا توپ جارىپ جۇرگەن وعلان شاۆكات راحمونوۆ.
عۇمىر جولى
اشىق دەرەككوزدەرگە سۇيەنسەك، باتىرىمىز 1994 جىلى 23 اقپاندا، وزبەكستاننىڭ سۋحانداريا ءوڭىرى، شىرشىدا قازاق وتباسىندا دۇنيەگە كەلگەن. قۇجات بەرگەن كەزدە تەگى قاتە جازىلىپ كەتكەن. نەگىزى – «راحمان». اۋلادا وعان ۇنەمى توبەلەسۋگە تۋرا كەلگەن. ايتپەسە، وزىنەن كۇشتى بالالاردان سوققى جەيتىنىن تۇسىنگەن. 12 جاسىنان باستاپ ەرەجەسىز جەكپە-جەك سايىستارىنا قىزىققان.
2010 جىلى وتباسى اتامەكەنگە ورالادى. ول قاراعاندى بازارلارىندا اربامەن جۇك تاسىپ، اۋىر ەڭبەكتى باستان كەشىردى. سويتە ءجۇرىپ، سپورت زالىنا بارۋدى ۇزبەستەن سامبو مەن بوكس جاتتىعۋلارىنا قاتىسقان. كەيدە كۇنىنە سپورت زالىنا ەكى مەزگىل بارۋعا تۋرا كەلسە دە، ۋاقىت تاۋىپ، جاتتىعۋدان قالماعان. 16 جاسىندا كاسىبي سپورت جولىنا تۇسەدى.
سپورتتىق مانسابىنىڭ باستاۋى
ءار سپورتشىنىڭ شامىن جاعاتىن اۋەلى ىنتا-جىگەرى، سودان كەيىن بىلىكتى باپكەرى ەكەنى انىق. وتباسى 2013 جىلى كوكشەتاۋعا قونىس اۋدارعان سوڭ، جاتتىقتىرۋشى بايان جانعالوۆپەن تانىسىپ، ونىڭ قۇراماسىنا كىرەدى. سونىمەن بىرگە سپورت سالاسىندا جوعارى ءبىلىمدى قاتار الادى. جاتتىعادى، وقيدى، ماقساتىنا جەتۋدى كوزدەيدى. بىرتىندەپ قاجىر-قايراتتىڭ ناتيجەسى بايقالا باستايدى.
باۋىرىمىز 19 جاسىندا ارالاس جەكپە-جەكتەن اۋەسقويلار اراسىنداعى العاشقى جەڭىسىنە سانكت-پەتەربۋرگتە قول جەتكىزەدى. بۇل سايىستا قايرات پەن شاپشاڭدىقتى قاتار كورسەتىپ، قارسىلاسى احمەددين ميرزاداۆلادوۆتى سۇلاتىپ سالادى.
العاشقى رەت 2014 جىلى قازان ايىندا ول M-1 Global پروموۋشەنىندە دەبيۋت جاسادى. وندا ادام سۋروۆتى اۋىر ۇستاۋ (ءۇشبۇرىشتى تۇنشىقتىرعىش) ارقىلى مەرزىمىنەن بۇرىن جەڭدى.
ول UFC-دەگى دەبيۋتىن 2020 جىلدىڭ 24 قازانىندا UFC 254 وقيعاسىندا وتكىزدى. حابيب - گەتجي الەكس «كوۆبوي» وليۆەيراعا قارسى كەزدەسۋدە عاجايىپ تاسىلدەردى قولدانىپ، 2-راۋندتا 2:10 ەسەبىمەن باعىنۋ (گيلوتينا دروسسەل) ارقىلى جەڭدى.
شاۆكات UFC-دەگى ءۇشىنشى جەڭىسىنە جەتىپ، تاعى ءبىر ساتىعا كوتەرىلدى. ناقتىراق ايتساق، UFC Vegas 47 تۋرنيرىندە جارتىلاي ورتا سالماقتا ب ا ق سىنايتىن وتانداسىمىز گاياندىق كارلستون ءحارريستى ءبىرىنشى راۋندتا ۇتتى. قازاقتىڭ باتىر ۇلى مما-دا وتكىزگەن 15 جەكپە-جەكتىڭ بارلىعىندا مەرزىمىنەن بۇرىن جەڭىسكە جەتكەن. وسىلايشا، 34 جاستاعى حارريس 17 جەڭىسىمەن مانسابىنداعى بەسىنشى جەڭىلىسكە ۇشىراپ، جەرلەسىمىزدەن ايلاسىن اسىرا المادى.
قازاقى نامىس
الگىندە بابالارىمىزدىڭ نامىستى، رۋحتى بولعاندىعىن تىلگە تيەك ەتتىك. ول جاعى شىندىق. قازىرگى تاڭداعى جاستارىمىزدىڭ بويىندا نامىس قايناپ، ۇلتتىق رۋحتىڭ وتى الاۋلاپ كەلەدى. وعان كۇن وتكەن سايىن كۋا بولۋدامىز.
شاۆكات - حالقىمىزدىڭ ناعىز باتىرى، استەرى جاستارعا ۇلگى. كاۆكازدىق حابيب نۋرماگانبەتوۆ پاپاحاسىن ءار جارىستا ناسيحاتتاپ، كيىپ شىعادى. سونداي ۇلتتىق قۇندىلىقتىڭ الەم الدىندا ناسيحاتتالۋىن ءبىز دە كۇتىپ جۇرگەن ەدىك. رۋحتى ءھام جۇرەكتى سپورتشى شاۆكات راحمانوۆ قازاقتىڭ ۇلتتىق باس كيىمى - تىماقتى كيىپ شىعىپ، ءبارىن ءتانتى ەتتى. سپورتسۇيەر قاۋىم ۇلتتىق جادىگەرلەرىمىزگە نازار اۋدارا باستادى. ول العاش بولىپ ءوزىمىزدىڭ ءداستۇرلى قۇندىلىعىمىزدى جالعاعان ازامات.
تاعى ءبىر مىسال كەلتىرەيىن. كەزەكتى جەڭىستەرىنەن كەيىن ءوزىن سىناۋشىلار مەن مىنەۋشىلەرگە قايىرىلىپ، الەۋمەتتىك جەلى قولدانۋشىلارىنا ءوزىنىڭ «ناعىز قازاق» ەكەنىن ايتتى. جەڭىستەرىمەن دالەلدەپ كەلەدى. ۇلتىمىزدا وسىنداي قازاقى نامىستى جىگىتتەردىڭ كوپ بولعانىنا قۋانامىز. مىڭ شۇكىر!
ءتۇيىن. الماعايىپ زاماندا جاس ورەندەرگە رۋح پەن قايرات بەرەتىن جاس تا بولسا تۇلعا كەرەك. مۇنى ۋاقىتتىڭ تالابى دەر ەدىك. ءبىزدىڭ حالىق باتىرعا كەندە ەمەس-تى. سپورت جانكۇيەرلەرىنە تانىمال ارمان وسپانوۆ، جالعاس جۇماعۇلوۆتار تالاي بيىكتەردى باعىندىرىپ ءجۇر.
العاشقىلاردىڭ ءبىرى بولىپ UFC-مەن كەلىسىم شارت جاساعان شاۆكاتتىڭ ءجونى ءبىر بولەك. باتىردىڭ سپورتتاعى جەتىستىكتەرى جاس ورەندەرگە ونەگە-ۇلگى ەكەنى اقيقات. قاراكوزدەرىمىز باتىر، وتانسۇيگىش، ادال ازامات بوپ قالىپتاسسىن دەمەكپىز.