قازاقستان بويىنشا 285 ەلدى مەكەندى سۋ باسۋ ءقاۋپى بار. ق ر توتەنشە جاعدايلار ءمينيسترى يۋريي يلين ۇكىمەت وتىرىسىندا وسىنداي مالىمەت بەردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
اۋەلى ول 2017-2020 جىلدارعا ارنالعان سۋ تاسقىنى ءقاۋپىنىڭ الدىن الۋ جانە جويۋ جونىندەگى جول كارتاسى شەڭبەرىندە 41،9 ملرد تەڭگەگە 402 ءىس-شارا ىسكە اسىرىلعانىن ەسكە سالدى. ال 2022 جىلعى سۋ تاسقىنى كەزەڭىنە دايىندىق بويىنشا سۋ تاسقىنى ءقاۋپى بار ەلدى مەكەندەردى قورعاۋدى كوزدەيتىن 148 ءىس-شارا قولعا الىنعان. ايتۋىنشا، سونىڭ ارقاسىندا 158 ەلدى مەكەندى تاسقىننان قورعاۋ ارتپاق.
«جالپى، سۋ تاسقىنىنا قارسى ءىس-شارالار كەشەنىن ىسكە اسىرۋ 340 ەلدى مەكەننەن سۋ باسۋ ءقاۋپىن الىپ تاستادى جانە 385 ەلدى مەكەندە ءقاۋىپ بارىنشا ازايتىلدى. بۇگىنگى كۇنى سۋ تاسقىنى ءقاۋپى بار 1010 ەلدى مەكەننىڭ 285ء-ى ءۇشىن ءقاۋىپ ساقتالۋدا»، - دەدى يۋريي يلين.
ونىڭ مالىمەتى بويىنشا، ەلدىڭ تاۋلى ايماقتارىندا مۇزدىقتاردىڭ قارقىندى ەرۋى دە تاسقىن ءقاۋپىن جوعارىلاتىپ وتىر.
«ءبىز كانالداردى تازالاۋ، جارىلۋ ءقاۋپى بار 17 مۇزداق كولدە سيفوندار ورناتۋ سياقتى الدىن الۋ ءىس-شارالارىن جۇرگىزدىك»، - دەدى مينيستر.