قازاقستاندىق تانىمال ازىلكەش تۇرسىنبەك قاباتوۆ ۇساق بۇزاقىلىق جاساعانى ءۇشىن اكىمشىلىك جاۋاپقا تارتىلدى، دەپ حابارلايدى almaty-akshamy.kz.
استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىنا سايكەس، تۇرسىنبەك قاباتوۆ اقبتك-نىڭ 434-بابىنىڭ 1-بولىگى بويىنشا ايىپتى دەپ تانىلدى.
ءىس ماتەريالدارىنا سايكەس، قاباتوۆ ۇشاق بورتىندا ماس كۇيىندە ادەپسىز سوزدەر ايتقان. سوتتا قاباتوۆ ءوزىنىڭ ستيۋاردەسسالاردىڭ ناشار قىزمەتىنە كوڭىلى تولماعانىن ايتىپ، ولارعا ءوز ەسكەرتۋىن بىلدىرگەنى انىقتالدى. ول ءوزىنىڭ ادەپسىز ءسوز ايتقانى نەمەسە ايتپاعانى ەسىندە جوقتىعىن ايتقانىمەن، قوعامدىق ءتارتىپتى بۇزعانى ءۇشىن كەشىرىم سۇراعان.
كۋاگەر، ياعني اعا ستيۋاردەسسا، قاباتوۆتىڭ ۇشاق بورتىندا ماس كۇيىندە بولعانىن جانە ادەپسىز سوزدەر ايتىپ، سول ارقىلى قوعامدىق ءتارتىپ پەن ازاماتتاردىڭ تىنىشتىعىن بۇزعانىن راستادى. قۇقىق بۇزۋشىنىڭ كىناسى كۋانىڭ ايعاقتارىمەن، جولاۋشىنى پوليسياعا بەرۋ اكتىسىمەن، بەينەجازبامەن جانە مەديسينالىق ساراپتاما قورىتىندىسىمەن راستالدى.
اقبتك-نىڭ 434-بابىنىڭ 1-بولىگىنىڭ سانكسياسى بويىنشا 20 اەك كولەمىندە ايىپپۇل سالۋ نەمەسە 5-تەن 15 تاۋلىككە دەيىن اكىمشىلىك قاماققا الۋ كوزدەلگەن. سوت جاسالعان ىس-ارەكەتتىڭ كولەمى مەن سيپاتىن، قوعامعا تەرىس اسەر ەتەتىن جانە قوعامدى سىيلاماۋشىلىقتى كورسەتۋگە باعىتتالعان، لايىقسىز مىنەز-قۇلىقتىڭ جالعاسۋىن ەسكەرە وتىرىپ، تۇرسىنبەك قاباتوۆتى 5 تاۋلىككە قاماۋعا الۋ جازاسىن تاعايىندادى.
قاۋلى زاڭدى كۇشىنە ەنگەن جوق، سوندىقتان ايىپتالۋشىنىڭ ونى اپەللياسياعا بەرۋ مۇمكىندىگى بار.