الماتى قالاسىندا ق ر وقۋ-اعارتۋ مينيسترلىگىنىڭ قولداۋىمەن وقۋشىلاردىڭ XII جازعى گيمنازياداسىنىڭ اشىلۋ سالتاناتى ءوتتى.
بۇل تۋرالى ۇلتتىق عىلىمي-پراكتيكالىق دەنە تاربيەسى ورتالىعى مالىمدەدى، دەپ حابارلايدى Almaty-akshamy.kz.
گيمنازيادا قاتىسۋشىلارىنا ساتتىلىك تىلەگەن ورتا ءبىلىم بەرۋ كوميتەتىنىڭ ءتوراعاسى قانىبەك جۇماشيەۆ بالالار-جاسوسپىرىمدەر سپورتىن دامىتۋدىڭ قانشالىقتى ماڭىزدى ەكەنىن اتاپ ءوتتى. ونىڭ ايتۋىنشا، مەملەكەت باسشىسىنىڭ قولداۋىمەن ءبىزدىڭ وقۋشىلارىمىز جىل سايىن حالىقارالىق دودالاردا جەڭىس تۇعىرىنان كورىنۋدە. ماسەلەن، ءبىر عانا 2023-2024 وقۋ جىلىندا قازاقستاندىقتار ءتۇرلى حالىقارالىق وليمپيادالار مەن عىلىمي بايقاۋلاردا 600-دەن استام مەدالدى قانجىلاعان.
«جاس سپورتشىلار ءۇشىن بۇل سايىس ءوز شەبەرلىكتەرىن شىڭداپ، تاجىريبەلەر جيناقتاۋعا عانا ەمەس، سونداي-اق جاڭا دوستار تابۋعا ۇلكەن مۇمكىندىك بەرەدى. گيمنازيادا بىزگە ەلىمىزدىڭ تالانتتى سپورتشىلارى مەن بولاشاق چەمپيونداردىڭ ەسىمدەرىن تانىستىراتىنىنا ءشۇباسىز سەنەمىن. بارلىق قاتىسۋشىلارعا ساتتىلىك جانە جەڭىستىڭ بيىك بەلەستەرىن باعىندىرۋىن تىلەيمىن»، - دەدى قانىبەك جۇماشيەۆ.
اتاپ ءوتۋ كەرەك، سپورتتىق سايىستار 2 ماۋسىم-28 تامىز ارالىعىندا استانا، الماتى، شىمكەنت قالالارىندا، اقتوبە، قوستاناي، پاۆلودار، تۇركىستان، باتىس قازاقستان، شىعىس قازاقستان، اقمولا جانە الماتى وبلىستارىندا وتەدى.
مۇندا ەكى مىڭنان استام وقۋشى سايىستىڭ 52 ءتۇرى جانە سپورتتىڭ 23 ءتۇرى بويىنشا ءوزارا باسەكەگە تۇسەدى. بۇل ۇستەل تەننيسى، فۋتبول، رەگبي، بادمينتون، سپورتتىق باعدارلاۋ، كورابل قۇراستىرۋ، ۇلتتىق سپورت تۇرلەرى جانە ت.ب.