بۇيرىقتىڭ ماتىنىنە ساي، الەۋمەتتىك قورعالاتىن ازاماتتارعا تەلەكوممۋنيكاسيا قىزمەتتەرىن كورسەتكەنى ءۇشىن تاريفتەردىڭ كوتەرىلۋىنە بايلانىستى اي سايىنعى وتەماقى مولشەرى قولدانىستاعى تاريفتىك جوسپار بويىنشا بايلانىس قىزمەتتەرىنە اي سايىنعى ناقتى شىعىس پەن قازىرگى شىعىس اراسىنداعى ايىرما رەتىندە ايقىندالادى.
قۇجاتتا الەۋمەتتىك قورعالاتىن ازاماتتارعا تەلەكوممۋنيكاسيا قىزمەتتەرىن كورسەتۋ تاريفتەرىنىڭ كوتەرىلۋىنە بايلانىستى وتەماقى تۇرعىن ءۇيدى ۇستاۋعا جانە كوممۋنالدىق قىزمەتتەردى تۇتىنۋعا اقى تولەۋ ءۇشىن تۇرعىن ءۇي كومەگىنىڭ بولىگى بولاتىن اقشالاي وتەماقى تۇرىندە بەرىلەدى دەگەن.
وتەماقى الۋعا كىم قۇقىلى؟
وتەماقى قازاقستان رەسپۋبليكاسىنىڭ اۋماعىنداعى جالعىز تۇرعىن ءۇي رەتىندە مەنشىك قۇقىعىنداعى تۇرعىن ۇيدە تۇراقتى تىركەلگەن جانە تۇراتىن الەۋمەتتىك قورعالاتىن ازاماتتارعا، سونىمەن قاتار مەملەكەتتىك تۇرعىن ءۇي قورىنان تۇرعىن ءۇيدى جالداۋشىلارعا (قوسىمشا جالداۋشىلارعا) تولەنەدى.
قانداي قۇجاتتار قاجەت؟
- وتەماقى الۋ ءۇشىن ابونەنت تۇرعىلىقتى جەرى بويىنشا ۋاكىلەتتى ورگانعا تۇرعىن ءۇي كومەگىن تاعايىنداۋ ءۇشىن قاجەت قۇجاتتارمەن جۇگىنۋى قاجەت. قۇجاتتاردىڭ تىزبەسى تۇرعىن ءۇي كومەگىن كورسەتۋ ەرەجەلەرىمەن ايقىندالادى جانە مىنالاردى قامتيدى:
- ءوتىنىش بەرۋشىنىڭ جەكە باسىن كۋالاندىراتىن قۇجاتتار (ءتۇپنۇسقاسى سايكەستەندىرۋ ماقساتىندا ۇسىنىلادى)؛
- از قامتىلعان وتباسىنىڭ تابىسىن راستايتىن قۇجات؛
- زەينەتاقى جارنالارى تۋرالى انىقتاما (ءتيىستى مەملەكەتتىك اقپاراتتىق جۇيەلەردەن الىنعان اقپاراتتى قوسپاعاندا)؛
- جۇمىس ورنىنان انىقتاما نەمەسە جۇمىسسىز رەتىندە تىركەلگەنى تۋرالى انىقتاما؛
- بالالارعا جانە باسقا دا اسىراپ وتىرعان ادامدارعا اليمەنت تولەۋ تۋرالى مالىمەتتەر؛
- بانك شوتى؛
- كوندومينيۋم وبەكتىسىن باسقارۋعا جانە كوندومينيۋم وبەكتىسىنىڭ ورتاق مۇلكىن كۇتىپ-ۇستاۋعا، ونىڭ ىشىندە كوندومينيۋم وبەكتىسىنىڭ ورتاق مۇلكىنە كۇردەلى جوندەۋ جۇرگىزۋگە اي سايىنعى جارنالار بويىنشا شوت-فاكتۋرالار؛
- كوممۋنالدىق تولەمدەر؛
- تەلەكوممۋنيكاسيا قىزمەتتەرى ءۇشىن تۇبىرتەك-شوتتار نەمەسە بايلانىس قىزمەتتەرىن كورسەتۋگە ارنالعان شارتتىڭ كوشىرمەلەرى؛
- مەملەكەتتىك تۇرعىن ءۇي قورىنان تۇرعىن ءۇيدى جانە جەكە تۇرعىن ءۇي قورىنان جەرگىلىكتى اتقارۋشى ورگان جالداعان تۇرعىن ءۇيدى پايدالانۋعا ارنالعان شىعىستىڭ شوتتارى.
وتەماقى تولەۋگە قاراجاتتى قانداي تارتىپپەن اۋدارادى؟
ۋاكiلەتتi ورگان ءار ايدىڭ 5-iنە دەيiن وتكەن اي ءۇشiن الەۋمەتتiك قورعالاتىن ازاماتتارعا تەلەكوممۋنيكاسيا قىزمەتتەرiن كورسەتۋگە تاريفتەردiڭ ءوسۋiنە وتەماقى تولەۋگە قاراجات قاجەت ەكەنiن رەسiمدەيدi جانە ونى مەملەكەتتiك جوسپارلاۋ ءجونiندەگi ۋاكiلەتتi ورگانعا جولدايدى.
الەۋمەتتىك قورعالاتىن ازاماتتارعا تەلەكوممۋنيكاسيا قىزمەتتەرىن كورسەتۋ تاريفتەرىنىڭ ءوسىمىن وتەۋگە قاراجاتتى اۋماقتىق قازىناشىلىق ورگاندارىنا اۋدارۋ كەزىندە ۋاكىلەتتى ورگان تولەمدەردىڭ مەرزىمى مەن سوماسىن كورسەتە وتىرىپ، ابونەنتتەردىڭ ءتىزىمى قوسا بەرىلگەن تولەمگە شوت-فاكتۋرانى ۇسىنادى.
ءوز كەزەگىندە ۋاكىلەتتى ورگان توقسان سايىن ەسەپتى توقساننان كەيىنگى ايدىڭ 5-ىنە بيۋدجەتتى اتقارۋ جونىندەگى ۋاكىلەتتى ورگانعا الەۋمەتتىك قورعالاتىن ادامدارعا تەلەكوممۋنيكاسيا قىزمەتتەرىن كورسەتۋگە تاريفتەردىڭ كوتەرىلۋىن وتەۋگە تولەنگەن سومالار تۋرالى اقپاراتتى ۇسىنادى.
بۇيرىق 2023 جىلدىڭ 13 تامىزىنان باستاپ قولدانىسقا ەنەدى.