«الماتىەلەكتروترانس» كومپانياسىن باسقارعان بەكمىرزا يگەنبەردينوۆ ۇرلىق جاساۋعا ارەكەتتەنگەنى ءۇشىن بەس جىلعا باس بوستاندىعىنان ايىرىلدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى «الماتىەلەكتروترانس» كومپانياسىنىڭ بۇرىنعى باسشىسى بەكمىرزا يگەنبەردينوۆكە قاتىستى قىلمىستىق ءىس بويىنشا شەشىم شىعاردى. جوعارعى سوتتىڭ سايتىندا جاريالانعان ۇكىمگە سايكەس، ق ر قك (بوتەننىڭ مۇلكىن ۇرلاۋعا وقتالۋ) 190-باپتىڭ 2-تارماعىنىڭ 4-بولىگى، 24-باپتىڭ 3-بولىگى بويىنشا كىنالى دەپ تانىلدى.
يگەنبەردينوۆ بەس جىلعا باس بوستاندىعىنان ايىرىلدى. سونىمەن قاتار وعان ءومىر بويىنا مەملەكەتتىك قىزمەتتە، سوتتاردا جانە جەرگىلىكتى ءوزىن-وزى باسقارۋ ورگاندارىندا لاۋازىمدى قىزمەت اتقارۋعا تىيىم سالىندى. «الماتىەلەكتروترانس» ەكس-باسشىسى جازاسىن ورتاشا قاۋىپسىزدىكتەگى تۇزەۋ مەكەمەسىندە وتەيدى.
بەكمىرزا يگەنبەردينوۆ بۇعان دەيىن «جىبەك جولى»، «استانا LRT» جانە «City Transportation Systems» جشس-دا ءتۇرلى قىزمەت اتقارعان. 2022 جىلعا دەيىن «الماتىەلەكتروترانس» ج ش س باس ديرەكتورى بولدى. 2022 جىلدىڭ قىركۇيەك ايىنىڭ سوڭىندا يگەنبەردينوۆ جۇرگىزىلگەن تەرگەۋ شارالارىنا بايلانىستى «الماتىەلەكتروترانس» باسشىسى قىزمەتىنەن بوساتىلىپ، قاماۋعا الىندى. سىبايلاس جەمقورلىققا قارسى قىزمەت «الماتىەلەكتروترانس» كومپانياسىنىڭ ەكس-باسشىسىنىڭ كاسىپكەردەن اتقارىلعان جۇمىس اكتىلەرىنە قول قويىپ، ونى تولەگەنى ءۇشىن 160 مىڭ دوللار العانىن حابارلادى.