تۇرمىستىق زورلىق-زومبىلىق تۋرالى قازاقستاندىق فيلم بەرلينالەدە باس جۇلدە الدى

بايقاۋعا 33 ەلدەن بارلىعى 29 كارتينا قاتىستى

«باقىت» قازاقستاندىق كوركەم ءفيلمى 72ء-ىنشى بەرلين حالىقارالىق كينوفەستيۆالىنىڭ (بەرلينالە) «پانوراما» سەكسياسىندا باس جۇلدە الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

سەنارييىن قازاقستاندىق جۋرناليس اسەم جاپيشيەۆا جازدى، رەجيسسەر – اسقار ۇزابايەۆ، پروديۋسەرى – بايان ماقسات قىزى.

«پانوراما» سەكسياسى – نەگىزگى كونكۋرستان كەيىنگى سالماقتى جۇلدە جانە ول 80ء-ىنشى جىلدارى ەنگىزىلگەن. بۇل كونكۋرستىڭ قازىلار القاسى كينويندۋستريانىڭ كاسىپقوي ماماندارىنان ەمەس، شىنايى كورەرمەندەردەن قۇرالعان. ولار كارتينانى كورۋدى اياقتاعاننان كەيىن بىردەن داۋىس بەرەدى.
بيىل كوروناۆيرۋسقا بايلانىستى شەكتەۋلەرگە قاراماستان، «پانوراما» سەكسياسىنا ەنگەن فيلمدەردى 20 مىڭنان استام ادام كورگەن. بيىل 72ء-ىنشى بەرلين حالىقارالىق كينوفەستيۆالىنىڭ اتالمىش سەكسياسىنا 33 ەلدەن بارلىعى 29 كارتينا قاتىستى.

تۇرمىستىق زورلىق-زومبىلىق تۋرالى باياندايتىن «باقىت» ءفيلمى كورەرمەندەر مەن حالىقارالىق ب ا ق تاراپىنان كوپتەگەن جىلى لەبىز جيناعان. سەبەبى ۇيدەگى وزبىرلىق قازاقستاندا عانا ەمەس، ءبۇتىن الەمدە وتكىر تۇرعان ماسەلە. سەناريي اۆتورلارى اسەم جاپيشيەۆا مەن اسقار ۇزابايەۆ ماتەريالداردى جەتە جيناقتاپ، فيلم شىنايى وقيعالارعا نەگىزدەلىپ ءتۇسىرىلدى.

«بەرلينالە جۇلدەسى – بۇل شىندىققا اينالعان مەنىڭ ارمانىم. مەنىڭ ەڭ اسقاق تىلەگىم – قوعامنىڭ، مەملەكەتتىڭ جانە زاڭنىڭ ايەلدەرگە دەگەن قاتىناسىن وزگەرتۋ. بۇل – مەنىڭ ميسسيام»، - دەدى پروديۋسەر بايان ماقسات قىزى.

كارتينادا قازاقستاننىڭ شاعىن قالاسىندا ءومىر ءسۇرىپ جاتقان وتباسى تۋرالى، ۇزاق جىلدارعا سوزىلعان تۇرمىستىق زورلىق-زومبىلىق پەن ماحابباتسىز ءومىر جايىندا باياندالادى. كۇيەۋى، ايەلى مەن ولاردىڭ بويجەتكەن قىزى – ءۇش نەگىزگى كەيىپكەر تۇرمىستىق زورلىق-زومبىلىقتىڭ بار مۇڭىن، اۋىرتپالىعىن كورسەتەدى.

ەسكە سالايىق، بۇعان دەيىن 72ء-ىنشى بەرلين حالىقارالىق كينوفەستيۆالىنىڭ Generation (بالالار مەن جاسوسپىرىمدەر تۋرالى فيلمدەر) كونكۋرستىق باعدارلاماسىنىڭ باس جۇلدەسىن رەجيسسەر فارحات ءشارىپوۆتىڭ قازاقستاندىق «سحەما» ءفيلمى جەڭىپ العان بولاتىن.