وليمپيادا مەدالىنە قول جەتكىزگەن ەلدەر قاتارى 29-عا جەتتى
بەيجىڭدە ءوتىپ جاتقان اق وليمپيادا ويىندارىندا جالپى مەدالدار كەستەسىندە نورۆەگيا قۇراماسى ەشكىمگە دەس بەرەر ەمەس، دەپ حابارلايدى Almaty-akshamy.kz قازاقپاراتقا سىلتەمە جاساپ.
نورۆەگيا قۇراماسى جۇلدەلەر كەستەسىندە ەكىنشى ورىندا تۇرعان گەرمانيادان 4 التىن ارتىق الىپ، جەكە دارا كوش باستاپ تۇر. ولاردىڭ ەنشىسىندە 15 التىن، 8 كۇمىس، 12 قولا (35) مەدال بار.
ال گەرمانيا قۇراماسى كەشە قورجىندارىن تاعى ءبىر التىن، ءبىر كۇمىس مەدالمەن تولىقتىردى. ناتيجەسىندە 11 التىن، 8 كۇمىس، 5 قولا (24) مەدالمەن ەكىنشى ورىندا كەلەدى.
سونداي-اق، بۇگىن وسىعان دەيىن ۇزدىك ۇشتىكتەن تۇسپەي كەلە جاتقان اقش قۇراماسىن جۇڭگو سپورتشىلارى ءبىر «التىن» ايىرماشىلىعىمەن باسىپ وزدى. وليمپيادانى ءوز ەلىندە وتكىزىپ جاتقان قىتايلىقتار 9 التىن، 4 كۇمىس، 5 قولا مەدالمەن ازىرگە ۇزدىك ءۇشىنشى ورىندى يەلەنىپ تۇر. ال اقش كەشەگى ورنىنان ءبىر ساتى تومەندەپ ءتورتىنشى پوزيسياعا جايعاستى.
مەدال كورسەتكىشىمەن ۇزدىك وندىقتا تۇرعان ەلدەر:
1. نورۆەگيا - 15 التىن، 8 كۇمىس، 12 قولا
2. گەرمانيا - 11 التىن، 8 كۇمىس، 5 قولا
3. جۇڭگو - 9 التىن، 4 كۇمىس، 2 قولا
4. اقش - 8 التىن، 9 كۇمىس، 7 قولا
5. شۆەسيا - 8 التىن، 5 كۇمىس، 5 قولا
6. نيدەرلاند - 8 التىن، 5 كۇمىس، 4 قولا
7. شۆەيساريا - 7 التىن، 2 كۇمىس، 5 قولا
8. رەسەي - 6 التىن، 11 كۇمىس، 14 قولا
9. اۆستريا - 6 التىن، 7 كۇمىس، 4 قولا
10. فرانسيا - 5 التىن، 7 كۇمىس، 2 قولا
ايتا كەتەيىك، ءدال بۇگىنگە دەيىن وليمپيادا مەدالىنە قول جەتكىزگەن ەلدەر قاتارى 29-عا جەتتى. ونىڭ ىشىندە 22 مەملەكەتتىڭ قورجىنىندا التىن مەدال بولسا، 26 مەملەكەتتە كۇمىس جۇلدە بار. سونداي-اق لاتۆيا، پولشا جانە ەستونيا ەلدەرى ءبىر-بىر «قولادان» ۇتىپ الدى.
وكىنىشكە قاراي، قازاقستان قورجىنى ازىرگە بوس تۇر. ەرتەڭ، وليمپيادانىڭ سوڭعى كۇنىندە 3 سپورتشىمىز سىنعا تۇسەدى. شاڭعى جارىسىنان انگەلينا شۋرىگا، يرينا بىكوۆا جانە نادەجدا ستەپاشكينا 30 شاقىرىمعا ماسس-ستارتتا جارىسقا تۇسەدى.