تۇرمەدەگى ىنىسىنە دەگەن «باۋىرماشىلدىعىن» ەسىرتكى زاتتارىن تاسىمالداۋمەن بىلدىرگەن
الماتى قالاسى بويىنشا قىلمىستىق-اتقارۋ جۇيەسى دەپارتامەنتىنە قاراستى لا-155/18 مەكەمەسىندە تەرگەۋ تۇتقىنىنداعى باۋىرىنا تەمەكىنىڭ اراسىنا جاسىرىپ، اپيىنتەكتەس تابلەتكالار وتكىزبەكشى بولعان جىگىت ۇستالدى، دەپ حابارلايدى Almaty-akshamy.kz.
مۇنداي ناشاقورلار اراسىندا سۇرانىسقا يە تابلەتكانى تۇرمەدەگى باۋىرىنا تاسىمالداۋشى مالىك دەگەن جىگىت بولىپ شىقتى.
مالىكتىڭ ءىنىسى وسى جىلدىڭ قازان ايىندا قىلمىستىق كودەكستىڭ 106-بابى بويىنشا دەنساۋلىققا اۋىر زيان كەلتىرگەنى ءۇشىن تۇتقىندالعان بولاتىن.
«ادەتتە تەرگەۋ يزولياتورىنداعى تۋعان-تۋىستارى مەن جاقىندارىنا تىيىم سالىنعان زاتتاردى تاسىمالداۋشىلار ءتۇرلى ءادىستى قولدانادى. ەتىكتىڭ ۇلتانىنا تىعىپ اكەلەدى، ناننىڭ اراسىنا سالادى، كونفەتتىڭ نەمەسە ءشايدىڭ قورابىنا جاسىرادى. الايدا، باقىلاۋشىلاردىڭ ءجىتى تەكسەرۋى ارقاسىندا تىيىم سالىنعان زاتتار تۇتقىندارعا جەتپەيتىنى بەلگىلى. وسى جولى دا «LD” تەمەكىسىنىڭ اراسىنا مۇقيات جاسىرعان تابلەتكالار باقىلاۋشىلار نازارىنان تىس قالمادى» -دەپ حابارلايدى قاجد باسپا ءسوز قىزمەتى.
تۇرمەدەگى ىنىسىنە دەگەن «باۋىرماشىلدىعىن» ەسىرتكى زاتتارىن تاسىمالداۋمەن بىلدىرگەن جىگىتتىڭ ءوزى دە ەندى جازادان تىس قالمايتىن بولدى.