دارىگەردىڭ باستاماسىمەن العاش رەت ادام رەپرودۋكسياسى ورتالىعى اشىلدى
الماتىدا ەلىمىزگە بەلگىلى دارىگەر، بىلىكتى باسشى، ق ر دەنساۋلىق ساقتاۋ ارداگەرى، «بەلسەندى ۇزاق ءومىر» قوعامدىق قورىنىڭ پرەزيدەنتى گۇلشارا عازيز قىزى ۋرمۋرزينانىڭ 80 جىلدىق مەرەيتويى اتالىپ ءوتتى، دەپ حابارلايدى Almaty-akshamy.kz.
ءىس-شارانى «قدسجم» قازاقستاندىق مەديسينالىق ۋنيۆەرسيتەتىنىڭ رەكتورى ارداق اۋەزوۆا سالتاناتتى تۇردە اشىپ، مەرەيتوي يەسىن قوعامدىق دەنساۋلىق ساقتاۋدى دامىتۋعا قوسقان زور ۇلەسى ءۇشىن جىلى لەبىزىن ءبىلدىردى. سونداي-اق ول عىلىمي كەڭەس بەرگەن ۋنيۆەرسيتەتتىڭ «قۇرمەتتى پروفەسسورى» اتاعىن جانە قازاقستان رەسپۋبليكاسىنىڭ دەنساۋلىق ساقتاۋ ءمينيسترى ا. ۆ. سويدىڭ اتىنان قۇتتىقتاۋ حاتىن تابىس ەتتى. وندا مەرەيتوي يەسىنىڭ ەڭبەك قىزمەتىن ءدال سيپاتتايتىن مىناداي جولدار بار: «قۇرمەتتى گۇلشارا عازيز قىزى! ءسىزدىڭ ەڭبەك جولىڭىز ەرەكشە. ۋچاسكەلىك دارىگەر-پەدياتردان باستاپ، ەلىمىزدىڭ جانە الماتى قالاسىنىڭ قوعامدىق-ساياسي ومىرىنە بەلسەندى قاتىستىپ، ءتۇرلى دەڭگەيدەگى باسشىلىق قىزمەتىن اتقاردىڭىز. ءسىز-قازاقستاننىڭ مەديسينالىق قوعامداستىعىنىڭ تانىمال كوشباسشىسىسىز...».
گۇلشارا عازيز قىزى سانالى عۇمىرىن دەنساۋلىق ساقتاۋ سالاسىنا ارناعان جان. ونىڭ تىكەلەي باستاماسىمەن قۇرىلعان مەديسينالىق ورتالىقتار بۇگىندە حالىق يگىلىگىنە قىزمەت ەتىپ كەلەدى. گۇلشارا عازيز قىزىنىڭ باسشىلىعىمەن الماتىدا العاش رەت سوماتيكالىق بالالار ساناتورييلەرى، ارالاس ەمحانالار، مەيىربيكە كۇتىمى اۋرۋحاناسى، پەريناتالدىق ورتالىق، ادام رەپرودۋكسياسى ورتالىعى اشىلدى.
ءىس-شارا بارىسىندا «الەۋمەتتىك مەديسينالىق ساقتاندىرۋ قورى» كەاق الماتى قالاسى بويىنشا فيليالىنىڭ باسشىسى تىلەۋحان شىلدەباي ۇلى ابىلدايەۆ قۇتتىقتاۋ ءسوز سويلەپ، «الەۋمەتتىك مەديسينالىق ساقتاندىرۋ قورى» كەاق باسقارما ءتوراعاسىنىڭ قۇتتىقتاۋ حاتىن جانە «ەڭبەك قايراتكەرى» مەدالىن تابىس ەتتى.
سالتاناتتى شاراعا الماتى قالاسى اكىمدىگىنىڭ، الماتى قالاسى قوعامدىق دەنساۋلىق باسقارماسىنىڭ وكىلدەرى، ارىپتەستەرى مەن زامانداستارى، شاكىرتتەرى قاتىستى: احمەتوۆ ۆ.ي.، سۋلتانگازييەۆا س.ە.، ەرجانوۆ ك.د.، كۋراكبايەۆ ك.ك.، مادەيەۆا ج.ا. جانە باسقالارى.
مەرەكەلىك شارا جالعاسىندا گۇلشارا عازيز قىزى اۋديتوريا الدىندا «كوشباسشىلىق» تاقىرىبىندا اكتىلىك ءدارىس وقىدى، ول ونىڭ ءومىرى مەن ەڭبەك قىزمەتىنە ارنالدى. سوڭىندا گۇلشارا عازيز قىزى ءىس – شارانى ۇيىمداستىرۋشىلارعا - «قدسجم» قمۋ، الماتى كلينيكاسىنىڭ قاۋىمداستىعىنا جانە «قازاقستاندىق مەديسينالىق كەڭەس» قاۋىمداستىعىنا ۇمىتىلماس تاماشا كەش ءۇشىن ۇلكەن العىسىن ءبىلدىردى.
ۋرمۋرزينا گۋلشارا گازيز قىزى 1966 جىلى الماتى مەملەكەتتىك مەديسينا ينستيتۋتىن بىتىرگەن. پەدياتريا بويىنشا كلينيكالىق ورديناتۋرانى اياقتاعاننان كەيىن الماتى مەملەكەتتىك دارىگەرلەر ءبىلىمىن جەتىلدىرۋ ينستيتۋتىندا ورديناتور دارىگەر، № 2 قالالىق بالالار كلينيكالىق اۋرۋحاناسىنىڭ ءبولىم مەڭگەرۋشىسى، № 3 قالالىق بالالار كلينيكالىق اۋرۋحاناسىنىڭ باس دارىگەرىنىڭ ورىنباسارى بولىپ جۇمىس ىستەدى. 1978 جىلدان باستاپ الماتى قالالىق دەنساۋلىق ساقتاۋ باسقارماسى ءبولىم مەڭگەرۋشىسىنىڭ ورىنباسارى قىزمەتىن اتقارادى. 1985 جىلى № 1 قالالىق بالالار كلينيكالىق اۋرۋحاناسىنىڭ باس دارىگەرى بولىپ تاعايىندالدى. قازكسر قىزىل كرەست جانە قىزىل جارتى اي قوعامىن باسقاردى. 1987 جىلدان باستاپ قازكسر دەنساۋلىق ساقتاۋ ءمينيسترىنىڭ ورىنباسارى بولىپ جۇمىس ىستەدى. 1991 جىلى الماتى ق. دەنساۋلىق ساقتاۋ باسقارماسىنىڭ باستىعى لاۋازىمىنا تاعايىندالدى. 1995 جىلى الماتى ق. مىندەتتى مەديسينالىق ساقتاندىرۋ قورىن باسقاردى. 1999 جىلى قازاقستاندا العاش رەت «حوسپيس» مەملەكەتتىك قايىرىمدىلىق مەكەمەسىن قۇردى جانە بىرنەشە جىلدار بويى باسقاردى.
دەنساۋلىقتى قورعاۋ جانە نىعايتۋ ىسىنە ولشەۋسىز ۇلەس قوسقانى ءۇشىن ناگرادالاردىڭ، مەدالدار مەن العىس حاتتاردىڭ يەگەرى. قازىرگى ۋاقىتتا «بەلسەندى ۇزاق ءومىر» قوعامدىق قورىن باسقارادى. ق ر دەنساۋلىق ساقتاۋ مينيسترلىگىنىڭ «ق ر دەنساۋلىق ساقتاۋ ۇزدىگى» (1992ج.) جانە «دەنساۋلىق ساقتاۋ ىسىنە قوسقان ۇلەسى ءۇشىن» (2011ج.) ۆەدومستۆولىق ءتوس بەلگىلەرىمەن ماراپاتتالعان.