تۇرمەدە وتىرعاندار دا جوو ءبىلىم الۋى مۇمكىن

جازاسىن وتەۋشىلەردىڭ دەنى 18-35 جاس ارالىعىنداعى جاستار.

ەلىمىزدە باس بوستاندىعىنان ايىرىلىپ، تۇرمەدە وتىرعان ادامدار دا جوعارى وقۋ ورىندارىندا ءبىلىم الۋى مۇمكىن، دەپ حابارلايدى اlmaty-akshamy.kz.   

قازاقستاننىڭ ادام قۇقىقتارى جونىندەگى ۋاكىلى عىلىم جانە جوعارى ءبىلىم مينيسترىنەن سوتتالۋشىلارعا وقۋ كۆوتاسىن ءبولۋدى سۇراپ وتىر.

ارتۋر لاستايەۆتىڭ مالىمەتىنشە، جازاسىن وتەۋشىلەردىڭ دەنى 18-35 جاس ارالىعىنداعى جاستار. وعان قوسا، قاماۋداعى 28 500 ادامنىڭ 59 پايىزى ورتا، 24 پايىزى ارناۋلى ورتا ءبىلىمدى، 6 پايىزى مۇلدەم ءبىلىم الماعان. سوندىقتان ولاردى دۇرىس جولعا بەيىمدەۋدىڭ بىردەن ءبىر باعىتى - ماماندىق الۋلارىنا مۇمكىندىك جاساۋ دەيدى.

ونىڭ ايتۋىنشا، باكالاۆريات باعدارلامالارى بويىنشا وقۋدىڭ ورتاشا قۇنى جىلىنا 1 ميلليون تەڭگە. بۇل سومانى سوتتالۋشىلار تولەي المايدى.

"جوعارى ءبىلىم الۋ – سوتتالعاندارعا بوستاندىققا شىققاننان كەيىن ءوز مۇمكىندىكتەرىن ىسكە اسىرۋ تيىمدىلىگىن ارتتىرۋعا جول اشاتىن، سول ارقىلى قايتا قىلمىس جاساۋ ىقتيمالدىعىن ازايتىپ، الەۋمەتتەندىرۋگە ارنالعان باعىتتاردىڭ ءبىرى. سونىمەن قاتار مەملەكەتتىڭ مىندەتى – سوتتالعانداردى تۇزەۋ مەكەمەسىنەن تىس ومىرگە دايىنداۋ"، – دەدى ادام قۇقىقتارى جونىندەگى ۋاكىل ارتۋر لاستايەۆ.