بۇرىن بالدىرعانعا قىزىلشا دياگنوزى قويىلعان ەكەن.
الماتى قالاسىنىڭ №2 بالالار كلينيكالىق اۋرۋحاناسىنا ۋلانۋ سيمپتومدارى بار ەكى جاسار بالا جەتكىزىلدى، دەپ حابارلايدى Almaty-akshamy.kz
حيرۋرگيا ءبولىمىنىڭ مەڭگەرۋشىسى مارات كاپتاعايەۆتىڭ ايتۋىنشا، اۋرۋدى دياگنوستيكالاۋ وتە قيىن بولعان. سەبەبى، كلينيكالىق كورىنىستەر، ناقتى دەرەكتەر ايقىن بولماعان. ودان ءارى ەمدەۋ تاكتيكاسىن دارىگەرلەر كونسيليۋمى قاراستىرىپ، دياگنوستيكالىق لاپاروسكوپيا جاساۋ تۋرالى شەشىم قابىلداندى.
«دياگنوستيكالىق لاپاروسكوپيا كەزىندە ءىش قۋىسىندا ۇلكەن مولشەردە ءوت تابىلدى. حولەسيستيت. ءوت پەريتونيتى. ءوت جولىنىڭ پەرفوراسياسى شامامەن 0،5 سم. بۇل پەرفوراسيانىڭ پايدا بولۋىنىڭ ناقتى سەبەپتەرى بەلگىسىز بولدى. كوپ جاعدايدا ىشكى اعزالاردىڭ پەرفوراسياسى ولاردا تاستاردىڭ نەمەسە پارازيتتەردىڭ بولۋىنا بايلانىستى بولادى. جەلشەشەكپەن اۋىرعاندا ىشەكتىڭ پەرفوراسياسى بولعان جاعدايلار ورىن العان، ءبىراق ول جاعدايدا ىشەكتە دە، سىرتقى تەرىدە دە بورتپەلەر بولاتىن. مۇندا ءىش قۋىسىندا بورتپەلەر بولعان جوق. ەشقانداي سەبەپسىز تۋىنداعان پەرفوراسيا جانە ءوت جولىنىڭ پەرفوراسياسى دەگەن حيرۋرگ رەتىندە كوپ جىلدىق تاجىريبەمدە ءبىرىنشى رەت بولىپ تۇر. قولدا بار مەديسينالىق ادەبي مالىمەتتەرگە سايكەس مۇنداي اقپاراتتى ەشكىم بەرمەگەن. بۇل وتە سيرەك كەزدەسەتىن پاتولوگيا»، – دەيدى حيرۋرگ.
ءسابيدىڭ ءومىرىن ساقتاۋ قالۋ ءۇشىن تاجىريبەلى حيرۋرگتار ءوت قابىن لاپاروسكوپيالىق جولمەن الىپ تاستادى. بۇل دۇرىس تاڭداۋ، باسقا نۇسقا بولمادى. تەسىكتى (پەرفوراسيانى) تىگۋ مۇمكىن ەمەس، ستەنوزعا جانە باسقا اسقىنۋلارعا اكەلەدى.
دارىگەر كاپتاعايەۆ وتانىڭ كۇردەلى، تەحنيكالىق قيىندىقتارمەن وتكەنىن اتاپ ءوتتى. سەبەبى، وتا ۇستەلىندە شىناشاقتاي بالانىڭ جاتقانىن ەسكەرسەك، وتا ءورىسى دە تىم كىشكەنتاي بولعان. جالپى ءوت جولى مەن قاپتىق ءوت جولى اراسىنداعى قاشىقتىق وتە از، ارەڭ بايلانعان. وتا ەكى ساعاتقا سوزىلدى.
«وتادان كەيىنگى كەزەڭ ءبىرقالىپتى ءوتتى. بارلىق سيمپتومدار جويىلدى. بالانىڭ اناسى وتە ريزا بولدى. وتادان كەيىن 10-شى كۇنى ءبىزدىڭ كىشكەنتاي ناۋقاس ۇيىنە جىبەرىلدى. گيپپوكراتتىڭ مىنانداي سوزدەرى بار: «مەن بارلىق ءتۇيىنى شەشتىم، تەك ءولىم ءتۇيىنىن شەشە المادىم». ءبىزدىڭ جاعدايدا ءبىز ءولىم ءتۇيىنىن شەشە الدىق، بالانىڭ ءومىرىن ساقتاپ قالدىق جانە ءبىز وتە قۋانىشتىمىز!»، – دەيدى مارات كاپتاعايەۆ.