تىلدەر مەرەكەسى قازاقستاندا جىل سايىن قىركۇيەكتىڭ ءبىرىنشى جەكسەنبىسىندە اتالىپ وتەدى.
مەنى جاس بۋىننىڭ وكىلى رەتىندە ءتۇرلى ۇلت وكىلدەرىنىڭ قازاق تىلىندە سويلەيتىنى قۋانتادى، دەدى قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ الماتى قالاسى بويىنشا مۇشەسى اننا توروسيان. بۇل پىكىرىمەن ول تىلدەر مەرەكەسىنە ارنالعان قۇتتىقتاۋى بارىسىندا ءبولىستى، دەپ حابارلايدى Almaty-akshamy.kz.
ادامزات قانشا عۇمىر سۇرسە، ءتىل دە جەر بەتىندە سونشا ءومىر سۇرەدى. بىرنەشە جىلدار بويى ۇجىمدار تىلدەردى قالىپتاستىردى، ولاردىڭ كومەگىمەن ادامدار وسى كۇنگە دەيىن بىر-بىرىمەن سويلەسە الادى جانە قارىم-قاتىناس جاساي الادى، ءوز ويلارىن، سەزىمدەرى مەن تىلەكتەرىن بىلدىرە الادى.
«قازىرگى ۋاقىتتا قازاقستان رەسپۋبليكاسىنىڭ اۋماعىندا ءوزىنىڭ كوپ عاسىرلىق تاريحى، مادەنيەتى، ءسالت-داستۇرى، ادەت-عۇرپى، سونداي-اق ءوز ءتىلى بار 120-دان استام ءتۇرلى ەتنوس وكىلدەرى تۇرادى. ەلىمىزدىڭ ءاربىر ازاماتى انا ءتىلىن قولدانۋعا، قارىم-قاتىناس، تاربيە، وقۋ، سونداي-اق شىعارماشىلىق ءتىلىن ەركىن تاڭداۋعا قۇقىلى»، - دەيدى قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ الماتى قالاسى بويىنشا مۇشەسى اننا توروسيان.
اننا ءوزى ارميان ەتنوسىنىڭ وكىلى، ءبىراق انا تىلىنەن باسقا، ول قازاق جانە ورىس تىلدەرىن بىلەدى.
«مەنىڭ زامانداستارىم ءبىزدىڭ مەملەكەتىمىز قازاقستان حالقىنىڭ كەز-كەلگەن ءتىلىن ۇيرەنۋ مەن دامىتۋ ءۇشىن جاعداي تۋعىزۋعا قامقورلىق جاسايدى دەپ سانايدى. ماسەلەن، ءبىزدىڭ ەلىمىزدە ءارتۇرلى ەتنوستاردىڭ تىلدەرىن ۇيرەتەتىن بىرنەشە مەكتەپ جۇمىس ىستەيدى. مەنىڭ ويىمشا، بۇل ادامنىڭ شىنايى بوستاندىعى. جانە بۇل بىزگە، بارشا قازاقستاندىق جاستارعا ۇلكەن ماقتانىش. مەنى جاس بۋىننىڭ وكىلى رەتىندە ءتۇرلى ۇلت وكىلدەرىنىڭ قازاق تىلىندە سويلەيتىنى قۋانتادى. مەنىڭ ورتامدا مۇنداي جاستار جەتكىلىكتى، ولار: ارمياندار، اۋعاندىقتار، ورىستار، ۋكرايندار جانە باسقالار. ال مەن ءۇشىن قازاق ءتىلى – حالىقتىڭ رۋحاني ءومىرىنىڭ بۇكىل تاريحى كورىنىس تاباتىن الەمدەگى ەڭ ادەمى تىلدەردىڭ ءبىرى»، - دەدى اننا.
ءقازىر ول مۇمكىندىگىنشە كوپ ءتىل ۇيرەنۋگە تىرىسۋدا.
ەلباسى نۇرسۇلتان نازاربايەۆ قازاقستان حالقى اسسامبلەياسىنىڭ ءححىى سەسسياسىندا سويلەگەن سوزىندە: «كوپ ءتىلدى ءبىلۋ – جاھاندىق ومىرگە جولداما. بۇل ادام ومىرىندەگى جەتىستىك قاعيداسى» ەكەندىگىن ايتقان بولاتىن.
«سوندىقتان مەن اعىلشىن، يتاليان، سونىمەن بىرگە وتانىمنىڭ ءتىلى - قازاق ءتىلىن ۇيرەنىپ ءجۇرمىن. مەن دەمالىس كۇندەرى ارميان مادەني ورتالىعىندا وتەتىن مەملەكەتتىك ءتىل كۋرستارىنا بارامىن، قازاق تىلىندە سويلەيتىن دوستارىممەن كوبىرەك سويلەسۋگە تىرىسامىن»، - دەيدى جاس بەلسەندى.