بايان-ولگيي ۆاكسينانىڭ ءۇشىنشى كومپونەنتىن سالا باستادى

ەگۋ جۇمىستارى 1 قىركۇيەكتەن باستالعان.

موڭعوليانىڭ بايان-ولگيي ايماعىندا كوروناۆيرۋسقا قارسى ۆاكسينانىڭ ءۇشىنشى كومپونەنتىن 1 قىركۇيەكتەن باستاپ سالۋ قولعا الىندى، Almaty-akshamy.kz Baq.kz-كە سىلتەمە جاساپ.

جەرگىلىكتى مونسامە اگەنتتىگىنىڭ حابارلاۋىنشا، بايان-ولگيي ايماعىندا ۆاكسينانىڭ ءبىرىنشى كومپونەنتىن العان 66499 ادام بولسا، ەكىنشى كومپونەنتىن العانداردىڭ سانى 61868 ادامعا جەتكەن.
ال وسى اپتادان باستاپ پوليسيا، توتەنشە جاعدايلار قىزمەتكەرلەرى، مەديسينا سالاسىنىڭ جانە مەملەكەتتىك قىزمەتكەرلەر قاتارلى قوعاممەن تىعىز بايلانىستاعى سالا ماماندارى مەن 55 جاستان جوعارعى ازاماتتار، سوزىلمالى سىرقاتى بار جاندار، ەكىقابات انالاردى ءۇشىنشى كومپونەنتپەن ۆاكسيناسيالاۋ باستالدى.
ايماقتىڭ دەنساۋلىق ساقتاۋ باسقارماسىنىڭ مالىمەتىنە قاراعاندا ءقازىردىڭ وزىندە 365 ادام Pfizer-BioNTech، Vero Cell قاتارلى ۆاكسينا تۇرلەرىن الىپ ۇلگەرگەن.
موڭعوليا ءبىر جىلداي كوروناۆيرۋس ىندەتىنىڭ ەل ىشىنە تاراپ كەتپەۋىنە بارلىق جاعدايدى جاساعان بولاتىن. الايدا، قاتەرلى ىندەتتى اۋىزدىقتاپ تۇرا المادى. بۇگىنگى تاڭدا موڭعوليا كولەمىندە 252313 ادام ۆيرۋس جۇقتىرعان.
ال بايان-ولگيي ايماعى بويىنشا ۆيرۋس جۇقتىرعاندار سانى 7561 ادامعا جەتتى.
موڭعوليا بويىنشا ۆاكسينانىڭ ءبىرىنشى كومپونەنتىن العاندار سانى 2،2 ميلليوننان اسسا، ەكىنشى كومپونەنتىن 2،1 ملن ادام العان. بۇل جالپى حالىقتىڭ 64 پايىزىن قۇرايدى.