بۇگىندە بارلىق ساياباقتار مەن 8 سكۆەر جوندەلگەن
وڭىرلىك كوممۋنيكاسيالار قىزمەتى الاڭىندا تۇركسىب اۋدانىنىڭ اكىمى باقىتجان اقجاروۆ «بيۋدجەتكە قاتىسۋ» جوباسى اياسىندا جىل سوڭىنا دەيىن جەرگىلىكتى تۇرعىنداردىڭ 32 ۇسىنىسى ىسكە اسىرىلاتىنىن ايتتى، دەپ حابارلايدى Almaty-akshamy.kz.
اقجاروۆتىڭ ايتۋىنشا، ولاردىڭ قاتارىندا سپورت، بالالار ويىن الاڭدارىن سالۋ، اۋماقتى كوگالداندىرۋ، قوعامدىق پايدالانۋ ورىندارىن جوندەۋ جانە جارىقتاندىرۋ، قاتقىل تۇرمىستىق قالدىقتاردى جيناۋ ءۇشىن تەرەڭدەتىلگەن كونتەينەرلىك الاڭداردى ورناتۋ بار. بۇل وزگەرىستەر تۇركسىب اۋدانىنىڭ بارلىق اۋماعىندا جۇزەگە اسادى دەپ بولجانۋدا.
اكىمدىكتىڭ مالىمەتىنشە، اۋداندا ءۇش ساياباق پەن 12 سكۆەر ورنالاسقان، بۇگىندە بارلىق ساياباقتار مەن 8 سكۆەر جوندەلگەن. مىسالى، بيىلعى جىلى «سەيفۋللين» ساياباعىنىڭ اعىمداعى جوندەۋ جۇمىستارى اياقتالدى، وندا بالالارعا ارنالعان شسن-دار مەن باسكەتبول الاڭى بار، سىرتقى جارىقتاندىرۋ جەلىلەرى اۋىستىرىلدى. وتكەن جىلى ساۋرانبايەۆ كوشەسىندەگى جاياۋ جۇرگىنشىلەر ايماعى كۇردەلى جوندەۋدەن ءوتتى.
«التاي-1 شاعىن اۋدانىندا تۇرعىنداردىڭ بوس ۋاقىتىن وتكىزۋلەرى ءۇشىن ويىن جانە سپورت الاڭدارى، سىرتقى جارىقتاندىرۋ جەلىلەرى، شاعىن ساۋلەت نىساندارى، اۋماقتى كوگالداندىرۋ بار جاياۋ جۇرگىنشىلەر ايماعى اباتتاندىرىلادى. سونداي-اق، مايلين كوشەسىندەگى سكۆەردى ءبولۋ بويىنشا جۇمىستار جۇرگىزىلۋدە جانە مولداعالييەۆ كوشەسى مەن چەحوۆ كوشەسىنىڭ جاياۋ جۇرگىنشىلەر ايماعىن كۇردەلى جوندەۋ بويىنشا 2022 جىلعا ارنالعان جوبا ازىرلەنۋدە»، - دەپ تولىقتىردى باقىتجان اقجاروۆ.
بۇگىن «تەكساي-جاربۇلاق» ساياباعى مەن ماياك توعايىن اباتتاندىرۋ جانە كوگالداندىرۋ جالعاسۋدا. ەكى سكۆەردى – «بالالار شىعارماشىلىق ءۇيى» جانە «اۋەجاي سكۆەرىن» جوندەۋ بويىنشا جوبا ازىرلەندى.
كوگالداندىرۋ ماسەلەسى اۋدان ءۇشىن وزەكتى بولىپ قالۋدا. بۇگىندە اۋداننىڭ جاسىل قورى قالالىق قوردىڭ 20%-ىن قۇرايدى. اۋداندا 424 مىڭ جاسىل جەلەك بار.
بيىل 50 اعاشتى سانيتارلىق كەسۋ، 4 100 اعاشتى فورمالىق كەسۋ، 500 ءتۇپ كوشەت وتىرعىزۋ اياقتالدى. 13 208 اعاشتى سانيتارلىق كەسۋ جالعاسۋدا.
«بيىل اۋدان تۇرعىندارىمەن بىرگە كوكتەمگى جانە كۇزگى كەزەڭدە 2 189 كوشەت وتىرعىزىلدى. سوڭعى ەكى جىلدا بارلىعى 74 مىڭ اعاش وتىرعىزىلدى»، - دەدى باقىتجان اقجاروۆ.
2021 جىلى اۋداندا 9،9 مىڭ ش.م. گۇل وتىرعىزىلدى، 2022 جىلى 11 مىڭ ش.م. گۇل وتىرعىزۋ جوسپارلانعان.